Goreyê par Stenbolî ameyîşê hûmara turîstî seyî ra 19 kêm bî û aşma gulane de zî na rêje vejîya seyî ra 26.5’î. Antalya de destpêka şerî ser o 500 otel qefelya, eynî rewş seba Stenbolî zî vîyarte yo. Taybetî turîstê ewropayij bi hinceta ewlenêbîyayîşî ser o Tirkîya ra nînî. Stenbol vînîkerdişê turîzmî ser o Ewropa de rekor şikit. Sektorê turîzmî de taybetî otelî, teqyayîşê bêmîyan bombeyan, nêserkewtbîyayîşê polîtîkaya teberî ya Tirkîya ser o ya ameyî qefelnayîş ya zî bira şenikkerdişî girewtî.
Do turîst çinî bo
Art Otel Lalelîya Stenbolî de yo û no otel zî zey otelê bîn problemêka gird cuyeno. Sazgehdarê otelî yê 35 serrî Kemal Yuksel babet ser o vat ke Tirkîya de xirabbîyayîşê sektorê turîzmî polîtîkaya AKPe yê şerî ra qewimyeno û wina vat: “Dinya de tewr ewle ca teyarageh î, hetta kemerê ma metalî ser o ma nêvîyarnenî la 3 terorîstê DAIŞe bi asanî kewtî zereyê teyaragehî. No ser zî demo derg do turîst nîro Tirkîya.”
Taybetî Rûs nînî
Yuksel ciresna ke çend rojê verî Veznecîler de bombeyêk teqîya û no teqyayîşî de zî otelê ci zî zirarêko gird dîyo, par hûmara turîstî ser o ‘merdim erdî derzî eştînî, derzî nêkewtînî erd’ la emser kûçeyan bi karker û wayîrê otelan bar bîyî û ê zî benda turîstî yî.
Yuksel aşkera kerd ke tena şarê bulgar, ermenî û arnavutî ra seba gêrokî ameyî, kewtişê teyaraya Rûsya pey şarê rûs nêameyî ewta, omidê înan sezonêko ameyox de yo.
Resepsîyonîst Anna Grîgoryan zî dîyar kerd ke kapasîteya otelî înan 150 ode ya labelê nika tena 15 odeyê înan barkerde ya, par kapasîteya înan seyî ra 70’î barkerde bîya la emser krîzê ekonomî ser o 25 karkerê xo karî ra vetî, nika ver bi îflasî de yî.
DÎHA/STENBOL