Wexto ke kes vîr keno se beno?
Selvî Tugluk: Demo aşma Xizirî ameynê, ma kom bîynê û şînê ser hênîyî, dormeya hênîyî pak kerdê, çira xo veşnaynê, loqmayê xo vila kerdê û ma veng daynê Xizirî. Hîrê rojan dewam kerdî, tay ciwanan hîrê rojan de qet awe nêşimitê. Nîyeta xo bi çi bikerdê, a ameynê hewna ey/ayî. Tay kesan zî waştê merdimêk bizewicî, tikey kesan karê bikerî, tikey kesan zî roja xizirî waştinê. Ma komelêkî hîna zafêr bi bawer bîyî. Key ke ma bawerîya xo dûr mendî, ma her çiyê xo vîn kerd. Verê zaf kesî ameynê hetê yewbînan saz kerdê, dîwanê şarî ameynê awankerdiş. Semah ameynê gêrayîş, meşê bi adir viraştî. Nika kultirê ma, bawerîya ma ame vîrkerdiş. Demo ame vîrkerdiş se bi? Şar, komel yewbînan ra dûr mendî. Nika ma nêzanî gelo cîranê ma nêweş o, vêşan o, têşan o? Labelê rewş zey wina nêbî.
Rayîrê Xizirî, rayîrê aşitî yo
Elîf Akdenîz: Demo qewimyayîşê ke herem de qewimyenî ra vînena, hêsir çimê min ra varenî. Ez wazena biberma, zerrîya min veşena. Êdî bes o! Xizir bi hawara merdimê teng bîyî yeno, ma teng bîyî. Seba aştî û birayîye vana; ‘Ya Xizir’. Verê di aşma Xizirî de çira ameynê veşnayîş, nîyaz ameynê vilakerdiş. Ma eyro loqmayê xo vila kenî, la ma şînî de yî. Ez wazena êdî aştî pê bêra. Rayîrê Xizirî, rayîrê aşitî yo. Rayîrê xelqkerdişê merdimîye yo. Kêm mendo no rayîrê ma, no kultirê ma bêro vîrkerdiş.
Dejê qirkerdişî
Sakîne Çetîndere: Destpêke ma cem girewtînê, qurban serebirnaynê, nîyaz vila kerdê. Nika na bawerîya ma ver vîrkerdişî de ya. Hîrê kultirî estî ke elewîtîye bi taybet zî bawerî kizilbaşî vejeno meydanî; aşma Gaxan, aşma Xizir û Hewtekeye yo. Ma ganî nê taybetîyan vîr nêkerî, eke ma vîr bikerî no demê ma bawerîya xo vîr kenî. Her akewtişê roje de ez pacaya banê xo ra silam kena; Ya Heq, Ya Muhammed, Ya Elî, Ya Xizir. Êdî vengê ma bigoşdarnî, nê qirkerdişan peynî bikerê. Qirkerdişê Dêrsimî de dapîrê ma, bawkalê ma, datê ma dejê giran cuyayî, ma nê dejan bi mergê Sûr û Cizîrî rayeko bîn cuyenî. Ma dekewtî aşma Xizirî, omidar î no şîdet êdî bivindero.
ANF/DERSIM