Endamê Meclîsê HDPyî Nasir Yagizo ke Başûrê Kurdîstanî de çalakîya xo ya grevê vêşanîye domneno, va ‘vernîya ma de tena çareyêk esto; o zî xoverdayîş o’ û wina dewam kerd: “Tena kurdî nê, ganî heme dost û embazî vera tecrîdî de vengê xo berz bikerî. Gerek ma vera nê de xoverdayîşê xo zî gird bikerî
Vera şertê giranî yê tecrîdî de çalakîya grevê vêşanîye dîyaya destpêkerdene û nizdîyê 6 aşmî yo ke grevê vêşanîye dewam keno. Çalakîya ke ameya destpêkerdene de çalakîya Hemsereka KCD û Parlamentera HDPyî Leyla Guvene roja 171. de dewam kena.
Çalakîya Nasir Yagizî Başûr de roja 158, çalakîya hepsîyan roja 133, çalakîya 14 kesan ya Strasbourgî û Îmam Şîşî roja 132, Mexmûr de çalakîya Fadîle Toke roja 98, Kanada de çalakîya Yusuf Îbayî roja 106. de bêmabên dewam kena. Reyna çalakîyê ke Parlamenteranê HDPyî Dersîm Dage, Tayyîp Temel û Murat Sarisaç zî dabî destpêkerdene, dewam kenî.
Çalakwanan ra Endamê Meclîsê HDPyî Nasir Yagiz zî 158 rojî yo ke grevê vêşanîye de yo. Yagizî sere de heme çalakwanê ke çarçewaya hemleya ‘Ma tecrîd bişiknî, faşîzm birijnî, Rayber Apo azad bikerî’ grev de yî û heme xoverdayoxan silam kerd.
Yagizî qala tecrîdo giran ke Rayberê Şarê Kurdî Abdullah Ocalanî ser o yeno domnayene kerd û wina va: “Ganî şarê ma û dostê ma vera tecrîdî de halê bêvengîye ra bivejyî. Reyna ganî vera kerdişanê faşîstan yê Kurdîstan û Tirkîya de benî de çalakîyanê xo zêde bikerî. Kurdan 31ê Adare de vindetişêko xurt nîşan da û zorê îttîfaqê AKP û MHPyî berd. No serkewtiş do ameyoxê Tirkîya û Kurdîstan ser o zî tesîr bikero. Ganî ma binkewtişê AKP û MHPyî bivînî û seba wedarnayîşê tecrîdî xoverdayîşê xo gird bikerî. Eke xoverdayîş gird bibo, tecrîd wedarîyeno. Cok ra ganî ma xoverdayîşê xo gird bikerî.”
Bi têkoşîn tesilî serkewtiş yeno
Yagizî da zanayene ke bi têkoşîn û xoverdayîşî tesilî serkewtiş yeno û wina va: “Vernîya ma de tena çareyêk esto; o zî xoverdayîş û têkoşîn o. Tena kurdî nê, ganî heme dost û embazî vera tecrîdî de vengê xo berz bikerî. Çimkî Rojhelato Mîyanên de çareserî tena Îmrali de ya û aye zî yena tecrîd kerdene. Gerek ma vera nê de hîna bihêz têkoşîn bidî û xoverdayîşê xo zî gird bikerî.”
Ê zî şîrikê dewleta tirk a faşîste yî
Yagizî qiseykerdişê xo de veng da dezgeyanê mîyanneteweyîyan û wina va: “Dewletê ke îdîa kenî ke ê heqanê merdiman pawenî, vera xoverdayoxanê grevê vêşanîye de 3 meymûnan kay kenî. Eke bêvengîye heta ewro dewam kena, no zî nîşan dano ke şima zî şîrikê dewleta tirk a faşîste yî. Kurdî û bitaybetî zî ciwanê kurdan ganî na bêvengîye qebul nêkerî. Ganî vera nê de xover bidî. Ez veng dana dezgeyanê sîvîlan ke wa ê zî bêveng nêmanî. Eke ma pîya bi hawayo bihêz xover bidî, ma resenî serkewtişî.”
AMED