Babete ser o nuştox Rêkeft Îsmaîlî zî qisey kerd û va ‘dewleta tirk wazena Başûrê Kurdistanî vera Vakurê Kurdistanî de bida xebetnayîş, cok ra ganî ma hayîdar bibî’ û qiseykerdişê xo wina domna: “Ameyîşê Serekwezîrê tirkan bedilîyayîşê radîkalî yê ke herême de qewimîyenî reyde eleqeder î. Bi taybetî proseso ke Rûsya, Îran, Tirkîya û Sûrîye nizdîyê yewbînan benî de zîyaretêko winasî ver ganî hukmatê Başûrê Kurdistanî hîna zaf dîqet bikerdêne. Çimkî dewleta tirk hewl dana yewna rey bi destê Başûrê Kurdistanî, Vakurê Kurdistanî ser de zextan bikera. Heto bîn ra dewleta tirk hesab kena ke operasyonê Mûsilî ra dima beşdarê dîzaynkerdişê Sûrîye biba.”
Dewleta Tirk terorîst a
Îsmaîlî reaksîyon nîşanê vatişanê Yildirimî ke Hewlêr de vatbî ‘PKK û PYD terosrîst î’ da û wina va: “Nê vatişê Yildirimî qet nînî qebulkerdiş. Dewleta tirk îdarekarê partîyê kurdan, serekê şaredarîyan, parlamenteran û hemserekanê partîyan bi hawayêko neheq tewqîf kena û erzena hepisxaneyî. Reyna SADAT, tîmê Esedullahî û DAIŞî vera kurdan de xebetnena. Raştîya xo de yê ke terorîstî kena, dewleta tirk a. Heto bîn ra zîyaretê dewleta tirkî seba partîyê PDK bî, la çapemenî de hewl danî ke nê zîyaretî sey zîyaretbîyayîşê hukmatê Başûrî nîşan bidî. La nika Parlamentoyê Başûrî kîlîtkerde yo. Cok ra heme vatiş û qerarê ke ameyî girewtiş, hetê PDKyî ra ameyî girewtiş. Çimkî nika serekê fermî yê Herêma Başûrê Kurdistanî çin o.”
REBAZ HESEN / ANF