Hemserokê HDP Fîgen Yuksekdag û Selahattîn Demîrtaş’î bi mesajeke nuştekî Newroz bimbarek kerdî û vatî: “Ma dê vera zilmî serreyê xo çewt nêkerê, ma dê her ca de rûmeta şarê xo bipawê û teqez serbikewê. Mesaja Yuksekdag û Demîrtaş’î ke girotxane ra rişnay wina ya:
“Waûbirayê ma yê bi rûmet, dayikê ma yê bi qedr, alwozê ma yê genc û cinî, ma bi mîlyonan kesê ke 7 serrî ra heta 70 serrî meydananê Newroz pir kerdîyê, bi germîya adirê Newroz bimbarek kenê. Ma Newroza ke wazena bibo wesîleya çareserî, demokrasî û haştî pîroz kenê. Adirê Newroz ke tarîyîya tewr giran roşnî keno emserr zî bi coş yeno wekerden.
Ma cigeyrayîşê azadî ra fek vera nêdanê
Bi vengdayîşê Birêz Ocalan’î Newroza 2013’ê açarnîya şolene û la o wextî ra na het siyaset nêeşkîya haştî diyarîye şarî bikero. Sebebê nayî israrê şer yê siyaseta serdest bo zî, ma xo hemverê şarê xo deyndar hîs kenê. Ma ser nameyê bi hezaran HDP’îyê ke girotxaneyan de yê, fina da bîn vanê ke ma dê ti wext cigeyrayîşê azadî ra vera nêdê, têkoşîna xo ya haştîye biramnê. Ma dê vera zilmî sereyê xo çewt nêkerê û her ca de rûmeta şarê xo bipawê, teqez serbikewê. Bi na munasebetî ma Roşanê Newrozê pîroz kenê, hemverê şehîdanê Newroz bejna xo kenê nimz. Newroz pîroz bo.”
ANQARA