Asya Mihemed a ji Efrînê çawa berê li Efrînê çêdikir, niha li Helebê jî zehtera malê çêdike. Asya balê dibe ser amadekariya zivistanê û dibêje: "Bihar û havînê, em amadekariyê ji bo zivistanê dikin. Her berhemek dema wê heye, em jî li gorî berheman amadekariya zivistanê dikin. Ji bo zivistanê min rîçalê gulan û çîlekan amade kiriye. Her wiha niha jî me dest bi amadekariya zehterê kiriye. Em ji zehterê re dibêjin zehtera malê, ji ber ku em wê zehterê bi destên xwe çêdikin." Asya bi bîr dixe ku wan li Efrînê jî zehter çêdikir: "Çêkirina zehterê di meha Gulanê de dest pê dike. Heta Tîrmehê berdewam dike. Tiştên dikevin nava zehterê nok, bizir, kizwan, simaq, savar, bindeq, fisteq, kuncî û wekî din in. Paşê em di beroşê de sor dikin, tevlî hev dikin û rojekê dihêlin. Paşê em dihêrin û çêdibe." Asya vî karê xwe weke karekî çandê jî dibîne: "Çawa ku dayikên me çanda xwe zindî kirin, pêwist e em jî çanda xwe ji nifşên pey xwe re bihêlin." JINNEWS/HELEB