Şehîd Zekî Şingalî dewa Şemsê ya Qubînê ke qezaya Êlihî ya de yeno dinya. Wexto ke Şehîd Zekî Şingalî ame dinya Kurdîstan de dewleta tirke asîmîlasyonêk dabî dest pêkerdene. Peyê çinkerdişê sûre ra çinkerdişê sipî game bi game ramitêne. Êdî winî bîbî ke kurdîstanij xo bi xo welatê xo ca verdayêne û şiyêne welatanê Ewropa, bitaybetî zî Elmanya.
Serra 1968î de berê Elmanya gurekaranê Tirkîya rê abî. Gurekarê şaranê Tirkîya şîyêne Elmanya û uca de gureyayêne. Bi no tewir Tirkîya û Vakurê Kurdîstanî de feraseta elmanijî raver kewt. Seba ke Kurdîstan de welatperwerî amebî çin kerdene, kurdî wayîrê welatê xo nêvejiyayêne. Qandê cû dewlete asîmîlasyonê xo de serkewte bîbî.
No planê dewlete hetê Rayber Abdullah Ocalanî ra ame xeripnayene. Rayberî verê verkan şarê kurdî mîyan de welatperwerî raver berd. Badê cû PKK rona û fikrê xo PKK reyde vila kerd. Rayberî dî ke şarê kurd vilayê dinya beno, her cayê ke kurdî estê rê kadro rusna û ê cayan de fikrê welatperwerî û yê şorişgêrîye raver berd. Sere de Ewropa û Ewropa de zî Elmanya de kadroyanê PKK bi fikrê Rayberîye reyde têkoşîn kerdêne. Ê serran ra nata Ewropa de kurdî xo rêxistine kenê û hêzêko gird danê welatî. Bi hezaran ciwanê kurdî Ewropa ra agêrayî û ameyî welat de têkoşîn kerdêne. Zafêrî zî bîyêne şehîd.
Şehîd Zekî Şingalî zî nê kurdanê Ewropa ra yew o. Heto bîn ra êzîdî yo. Bi naskerdena ey Tevgerê Azadîye ra o ardo xo. O zî destpêk ra heta roja ke şehîd bîyo layiqê Rayberîye û bêmabên têkoşîn dayo. Zekî Şingalî hem Ewropa de hem welat de hem zî Şingal û Başûrê Kurdîstanî de bi serranê derg û dila têkoşîn dayo. Heme azayanê keyeyê xo kirişto têkoşînî mîyan. Peynîye de yew lajê xo zî bîyo şehîd.
Zekî Şingalî bi nê pratîkê xo bîyo gird, bîyo serwerê şarê xo. Rayîr nîşanê şarê xo yê êzîdî û ne êzîdî dayo. Şert û şûrtanê zehmetan ra vîyarto û îradeyê ci bîyo sey pola. Vera tasfîyekaran de vinderto û rêxistine pawito. Vera dişmenî de bi kîn têkoşîn dayo û dişmen tersnayo. Ey cesaret dayêne embaz û şarê xo. Qendîl û Şingal de ma pîya pratîk kerdo. Ez nêzdî ra bîya şahidê şexsîyetê ey. Şehîd Zekî Şingalî; baş o ke mi ti şinasnayî. Ez bi embaztîya to serberz a.
Bêgûman sere de Rayber Abdullah Ocalan, PKK seba azadîya şaran û merdimîye kadroyan resnenê. Eke ma şorişan ra biewnê ma vînenê ke problemê kadroyan zaf gird o. Rayberîye naye hol zanayêne. Coka serra 90î ey xebatê kadrotî kerd ke kadro bieşko şarî rê serwerîye bikero. Şehîd Hakî Karer ra heta Şehîd Zekî Şingalî bi hezaran kadro resayî û şehîd kewtî. Bi des hezaran kadroyî zî hîna têkoşînî mîyan de yê.
Dişmenan waştêne bi bêtesîrkerdişê Rayberîye têkoşînê ma bin fînê. Labelê nêbî. Na fin waştêne PKK sey partîyêka pirr xirab a bimojnê la şarî cewab da dişmenan û vatêne: ˝PKK şar o, şar tîya de yo˝. Fina hesabê dişmenî nêgirewt. Badê nê kerdenan dişmenî dest eşt kadroyanê ke partî û rêxistine îdare kenê. Goreyê dişmenan eke nê kadroyê îdarekar bêrê çin kerdene, kadroyanê bînan eşkenê bixapênê û biancê xo het. Esas hesap no yo la no hesap zî sey yê verênan şaş o.
Şehadetê Şehîd Zekî Şingalîyî do Tevgerê Azadîye ra bibo hêz. Peynîye de dişmenî do bibê poşman. No şar do nê kerdenanê Tirkîya, PDK û Iraqî qebûl mekerê û nê dişmenan poşman bikerê.