Îdarekara KCDyî Zelal Bîlgîna ke Leyla Guvene dir manena, qala rewşa weşîya Guvene kerde, îrade, bawerî, qerardarî û umîdê aye kerde.

Hemsereka Kongreya Cimatê Demokratîkî (KCD) û parlamentera Partîya Demokratîke ya Şaran (HDP) ya Colemêrgî Leyla Guvene, seba qedîyayîşê tecrîdkerdişê Rayberê Şarê Kurdî Abdullah Ocalanî 112 rojî yo ke grevê vêşanîye yê bêdem û bêagêrayîşî de ya.

79 rojê çalakîya Guvene Zîndanê Tîpê Eyî yê Amedî de bi esîrîye ravêrtî. Dimayo ke Guvene 25ê Çele de ameye veradayene, çalakîya xo keyeyê xo de domnaye. Pîya bi keynaya Guvene, aktîvîstê TJAyî û vervatoxa delegeyanê KCDyî yê Amedî Zelal Bîlgîne zî Guvene dir manena. 7ê Teşrîna peyêne de gama ke Guvene qerarê grevê vêşanîye eşkera kerd, Bîlgîne aye dir heman koxuşe de mendêne. Bîlgîne bi qerarê mabênî roja 22. ya çalakîya Guvene de amî veradayene û teber de zî çalakîya Guvene şopnaye. Bîlgîna ke heman wextî de kedkarê weşîye ya, Guvene dir manena. Bîlgîne qala rojêka Guvene û qerardarîya aye ya çalakîye kerde.

Ma do aye tena mêverdê

Bîlgîne ard ziwan, pîya bi cinîyan ê TJAyî ê Leyla Guvene dir ê û va: “24 saetî ma pîya yê. Hem seba ke halê aye yê weşîye control bikerê, hem zî heyet û meymananê ke yenê dir eleqedar bibê. Ma aye tena nêverdanê.”

Rojêka Guvene

Zelal Bîlgîne derheqê rojêka Guvene de qisey kerd û vat, “Birêze Leyla Guvene serê sibayî saet mabênê 09:00-09:30 de dest bi roje kena. Seba ke nêeşkena weş rakewo, gama ke hurzena bêhewn a. Dejêko giran este û masulkeyanê aye de esto. Naye ra zî hewn nêkeweno çimanê aye. Sere de tansîyonê aye peymena. Goreyê halê aye yê tansîyonî zî ma nisbetê sole û şekirî bewlî kenê û danê ci. Zafane tansîyonê ci kewte yo. Dorê 8/4 yan zî 7/4 de yo. No zî beno sebeb ke ma timî bi sole dest bi roje bikerê. Dimayo ke ma bi na yewe tansîyonî resna dereceyêk, ma roje domnenê. Bi hawayêkê binîzamî xeberan şopnena. Xora televîzyon timî akerde yo. Seba ke vengo berz aye aciz keno vengê televîzyonî tim kemî yo. Ma aye rojname û medyaya cimatkîye ra xeberan wanenê.”

Dejê masulkeyan û esteyan

Bîlgîne dewamê qalîkerdişê xo de qala rewşa Guvene kerde û wina domnaye: “Nizdê di saetan ra reyêk awe şimena. Goreyê halê aye, roje tewr tay ma hîrê reyî tansîyonê aye kontrol kenê. Çunke tansîyonê aye tim keweno. Vîtamînê Byî bi hawayêkê binîzamî gêna. Eke o roje bi hawayêkê plankerdeyî heyetêk yan zî meymanêk çinbo, ge-gane kena ke rakewo… Hendî bedenê aye helêno, kîloyê ci tim beno kemî. Rîyê dejê masulkeyan û esteyan ra bişewe xeylî zehmetîyan ancena. Guvene hemverê vengan de bîya hesase û gama ke vengêko nimz zî bêro hewn ra ceniqêna û seba ke nêeşkena rakewo tim bêhal a.”

Îradeyê aye ma matmende verdano

Bîlgîne qiseykerdişê xo yê peyênan de va: “Rixmê nê heme çîyan de zî xeylî bimoral a û wayîrê îradeyî ya. Îradeyê aye ma matmende verdano. Ma bawer ê ke bê ke zirarêko pîl bireso aye do proses bi ser bikewo.  Guvene bi tena sereyê xo dest bi xoverdayîşî kerd, la nika zîndanan de 331 tepişteyî, Hewlêr, Mexmûr, Strasbourg û xeylî cayanê teberê welatî de xoverdayoxî tewrê çalakîye bîyê. Guvene weşîya xo ra vêşêr weşîya çalakwananê bînan fikirêna. Çunke mesuldarîya aye xeylî giran a. Barêko giran doşê aye ser o yo. Xoverdayîşî rê serkêşîye kena. Gama ke halê weşîye yê tayê embazan ver bi xirabîye şino, a kewena mîyanê ters û qesawetî. Yanî waştişê aye no yo ke bê ke zirar bireso yewî, hukmat çarçiwaya qanûnê bingeyênî de tecrîdî wedaro.”

 

 AMED