Girotxaneyanê Tirkîye de tepişteyan seba wedarnayîşê tecrîda ser Rayverê Şarê Kurd Abdullah Ocalan’î û binlingkerdişê heqan destpa grevê vêşanî kerd. Bi nê waştenan 26 tepişteyê ke Girotxaneyanê Şakranî de manenê, 15ê Sibate ra tepya destpa nûmayişî kerd. 

Tepişteyê ke 41 rojîya grevî de yê, nika bi îşkence û tehdîdanê midûrê girotxane ra rî bi rî yê. Goreyê îdîayan midûrê yewîn Mustafa Sonmez’î bi vatenanê “Wa malbatê şima bîrê şima bixelesnê. Çîyê ke Esad Oktay’î nêkerdî ez a bîyara sereyê şima” tepişteyan tehdît kerd. Herzewbîn cendirmeyî seatanê şanî de erzenê qowişan ser û tepişteyan derb kenê. 

‘Wa malbatê şima nika bîrê û şima bixelesnê’

Tepişteyê bi nameyê Omer Akyol ke serra 1996’î de ame girewten û cezayê muebetî girot, bi raya telefonî binlingkerdişê heqan yê girotxaneyan, malbata xo rê ciresna. Akyol’î da zonayen ke embazê înan yê ke grevî de yê 15-16 kîlo vinî kerdê û enê detayan bare kerd: “Midûrê Girotxane Mustafa Sonmez’î bi 50 cendirmeyan eşto qoxişan ser û bi hawayê fizîkî tepişteyan rê îşkence kerdo. Sonmezî bi vatişanê “Çima şima malbatanê xo ra vat. Çima malbatê şima mi teşhîr kenê. Şima dê neyra tepya bivînê ka ez a çi bîyara sereyê şima. Wa malbatê şima bîrê û şima bixelesnê. Çîyê ke Esad Oktay’î nêkerdî ez a bîyara sereyê şima.”

 ‘Cezayê hucre, mektûb, pêdîyayîşî

Cinîya bi nameyê Hayat Sicakozlu ke şî pêdîyayîşê birayê xo zî behsê tehdît û sereştişanê Midûrê Girotxane Mustafa Sonmez’î kerd. Sicakozlu aşkere kerd ke ‘bi şew seat 2-3 de eştê qawişan ser’ û enê detayan da: “Kincê tepişteyê ke şîye revîrî dirîyayê. Dest nay postalê tepişteyan ser. Cezayê mektûbnuştişî, pêdîyayîşî û cezayê hucre diyîyayo tepişteyan.” Sicakozlu, ard ziwan ke wexto ke ê şîye pêdîyayîşî, gardîyananê cinî înan tacîz kerdo.

Edîrne de îşkence

Heto bîn ra tepişteyê ke Girotxaneyê Edîrne de Grevê Veyşanî yê bêdem û bêdorveger de yê zî raştê îşkenceyan yenê. Tepişteyan ra Muhammed Saîd Kûlû ke bi çehar embazanê xo ra pîya hetê gardîyanan ame derbkerdiş û hewadîya nêweşxane, ci rê rapor nêamê dayen. 

Maya Kûlû Fermusse Kulu ke bi telefonî lajê xo ra qisey kerd da zonayen ke, lajê ci Muhammed Saîd û 4 tepişteyê bînî raştê îşkenceyê gardîyanan ameyê. Netîceyê îşkence de lajê ci Muhammed Saîd ser xo ra şîyo û hewadîyayo nêweşxane. La rixmo ke ser ganê ci de şopê îşkence estbî zî, doxtoran vato ‘Derb çin o’ ci rê rapor nêdayo.  

‘Pêrokîn kerdenan rewa kenê’

Jew tepişteyo bîn ke Girotxaneyê Edîrne de maneno Mehmet Alî Aslanî zî bi mektûbeke hayr ant binlingkerdişê heqan ser. Aslanî da zonayen ke bi behaneyê “tîvarîye” her çî rewa yeno vînayen. 

Tepişteyan ra Adar Ozel ke Girotxaneyê Maltepe No 1 de manena zî da zonayen ke 21ê Adarî de vetişê edlîye ra heta girotxane ameyê derbkerdiş. Ozel vengê wayîrvejyayîşî kerd. 

‘Kerdenê kampanê komî ferz kenê’

Verfeka Koma Meclîsa Cinîyan ê HDP Dîlan Dîrayet Taşdemîr zî Navenda Pêroyî yê HDP de, derheqê îşkence û îxlalê heqan yê girotxaneyan de kombîyayîşê çapemenî viraşt. Taşdemîr polîtîkayanê hikûmet yê vera tepişteyan rê nêrazîbîyayîş damûsna û aşkere kerd ke, girotxaneyan de kerdenê kampanê komî ferz kenê. 

Verfeka Koma Meclîsa Cinîyan ê HDP Dîrayet Taşdemîr vist vîrî ke bi teybezî ser Birêz Ocalan û tepişteyanê bîn yê sîyasî ser o tecrîdeke giran esta.”   


NAVENDÊ XEBERAN