Ceniyê beters ê Kurdistanî
Mektubêkî hetê dayîkêke ameya nuştiş, bi no rengî yo: “Ez zî dayîkêk a, nêzana gelo min seba no kerd! Demo şima oca de xover daynî, nêzana min çi kerd! Min efû bikerî. Min waşt zaf çikî bikera, la.. Noca de hetanî destê min çi yena ez hewl dana hetkarîyêke bikera şima. Şima cenîyê bi rûmet û bêters ê Kurdistanî yî. Ez zî hêz şima ra gêna. Nêvajî qey şima oca de rehet î, her roj ma qehrîyenî. Bedenê min şima reyde nîyo la zerrîya min şima reyde ya. Seba nêeşkena bêra Cizîrî, ez gelekî dejena. Zerrî wazena şima ra zaf çik binusa la nêbena. Hetanê nîra Cizîrî, hetanî şima virra nêkera, noca de zerrîya min dirbetin a û gonî dana. Ez verê xoverdayîşê şima bi rêzdarî sereyê xo çewt kena. Hezar silam cenî û domanê Cizîrî ra. Ma do bi xoverdayîşî serkewê.”
Biciwe aştî, biciwe doman
Mektbêko bîn zî wina yo: “Merhaba, ez Stenbol de manena. Ez do seba şima ewta têkoşîn bida û hetanî destê min ra çi bêra zafêr bixebita. Şima rûmetê ma yî. Rojê tewr weş verê ma deyî, seba dîyîşê nê rojê weş wa heme domanê kurdî bi rûmet xover bidî. Ma ewta de yî, şima Kurdistanî de yî. Ma xover bidî û înşallah ma nê rojê weş bivînî. Şer biqedîyo, aştî bêra. Biciwî aştî, biciwî doman.”
ANF/CIZÎR