Rengê meydanan açariyay Kobanê, pêrokîn meydanan ra boya xoverdayiş, boya omid, boya serkewtiş û boya serbestî yena. Kobanê nika ra serkewto, şexs dê serkewtişê Kobanê de pêrokîn Kurdistan serkewto û mîladê Kurdan destkerdo ci. No serkewtiş tenya serkewtişê netewî yê Kurdan niyo. Kobanê de ceniyê ke dawayê azadî kenê serkewtiyê. Şarê bindest û mazlûm serkewtiyê. Sîstemê sosyalîzmê demokratîk û azadîwaşt serkewtiyo. Hewn, xeyal û omidê rojanê roşn û rindî yê şaranê pêrokîn dinya ganî bî. Kobanê îspat kerd ke; hewceyinê şaran ebi netew-dewletan, dîktatoran, şax û padîşaxan nê, ebi sîstem û îdareyê demokratîk û konfederal yê şaran esto. Kobanê îspat kerd ke; şar şeno xo ebi qûwetê xo yê cewherî îdare bikero, pawitişê xo yê cewherî bigîro, verr dê pêrokîn taloke û hêrişan xover bido. Kobanê îspat kerd ke; mavêna şaran de mesele-pirsgirêkê etnîk, dînî, siyasî, kiltûrî û îdeolojîk çinîyê. Yê ke şaran anê pêver polîtîkayanê dewletanê. Kobanê îspat kerd ke; Kurdistan jû yo û mavên de sînorî nêmendiyê. Çi ke çihar leteyê Kurdistan’î çormeyê Kobanê de bî jû. Çi ke Kobanê de Amed, Çewlig, Sêwereg û Dersîm ra bigîr, Silêmanî, Qeladizê, Şaqlawa ra heta Urmiye, Kirmanşah, Mehabad û Makû lejwanê-şervanê Kurd hardê xo, welatê xo pawenê, doş bi doş dustê dişmenanê xo danê piro. Kobanê îspat kerd ke cenî sitûna homet-civakî ya. Şoreşê rojawa zey şoreşê neolotîk ebi destê ceniyan, ebi verniyîna înan de ame munayiş. Kobanê serkewtiş û serbestiya ceniyan îspat kerd û damisna ke ceniyê ke xo tenzîm kenê û serva nay tekoşîn danê serkewnê.
Kobanê îspat kerd ke dinya de sîstemê do alternatîf, demokratîk û azad mimkûn o. Nay ra Kobanê bi omidê pêrokîn şaranê dinya yê ke xeyalê roşanê azad kenê. Yê ke vanê ‘kobanê kobanê kewt, kobanê kewno, esasê ci de çiyo ke kewno hewn û xeyalê înanê. Çiyo ke kewt xeyal û konseptê Anqara yê, polîtîkayê înkar-îmha yê se serran ê sîstemê serdestan ê. Eksê nê vatişan Kobanê serkewt û bi kêberê azadî yê dinya.