Înîsîyatîfê Rojnamegeranê Azadan raporê xo yê îxlalê heqan yê aşma Tebaxe eşkere kerd. Rapor de ameyo vatene ke aşma Tebaxe de zextî her ke şîyî zêde bîyî û dewamê raporî de dîyayo zanayene ke her aşme rojnamegerî tepişîyenî, tewqîf benî û ceza gênî.
Înîsîyatîfî raporê xo de waşto ke wa nê zext û tedayî biqedyî û wina vato: “Tirkîya de hîna zî 146 rojnamegerî tewqîfbîyaye yî. Eke hukmat vano ma welatêko demokratîk î û vera huqûqî de rêz gênî, o wext wa rojnamegeran serbest verabido û zextan wedarno.”
Înîsîtîfî dewamê raporê xo de wina vato: “Aşma Tebaxe de 15 rojnamegerî tepişîyayî û 2 rojnamegeran rê tehqîqat abîyo. Reyna derheqê 5 rojnamegeran de doze abîya û rojnamegerêk rê 2 serrî 4 aşmî ceza dîyaya. 700 xeberî ameyî qedexekerdene, erzîyayo keyeyê rojnamegerêk ser de û 2 rojnamegerî ameyî derbkerdene. “
AMED