Roşnvîrê Vaşûrî Mihemed Seîd, ser Qirkerdişê Enfal’î de qisey kerd û da zonayen ke Nagazakî û Hîroşîma de çi qewimya se Enfalî de zî eynî çî qewimya yo. 14ê Nîsan’î de zî no qirkerdiş resya merhaleyê tewr berz.
Taye kurdî zî hemkarî yê
Seîd’î ciresna ke Qirkerdişê Enfalî encamê pêkerdişê dewleta Iraqî û dewletê heremî û dewletê dinya de ame kerdiş û wina verdewam kerd: “Tay kurdî zî bîyî hemkarê qirkerdişî û kurdî wextê bombevarnayîşî de nêverdayî ke şar cayê ke yenî bombekerdişî ra bivejyî. Dewa Goktebe ke ez bi xo zî tede biya, 3’ê gulana 1988’î de hetê balafir û helîkopteran ra ame bombekerdiş. Ma aye wextî waşt ke cenî û domanan bîşêrî cayêko bi ewle la vernîya dewa ma cayê bînan zî bombe kerdbî. Qirkerdişî de ti cîyayî nêkerdênê û verê xo bidaynê kura, weyra têdin xira kerdênê, veşnaynê û qetil kerdênê. Merdim eciz beno la nê qirkerdişî de destê kurdê hemkar zî estbî û xeylê merdimê ma teslîmê artêşê Iraqî kerdî.”
Gam bi gam vila bi
Seîd’î dîyar kerd ke hêrişî ewil dewê dormeyê Kerkûkî de dest pê kerdî û qalîkerdişê xo wina domna: “Nê hêrişî agêrayî bî hêrişê qirkerdişê pêroyî û resayî heremê Karadag, Hewraman, Şarezor, Germîyan, Koy, Şiwan, Şêxbizin, Rewandiz û Behdînanî. Nê hêrişan de heme çîyê ke kurdewarî ra eleqedar kerdî hedef û waştî hemînan werte ra wedarnî. Goreyê cigêrayîşan Qirkerdişê Enfalî de 182 hezar kurdî ameyî qetilkerdiş û no sucêko gird o. Enfal tena qirkerdişê fîzîkî nîyo, ser nameyê kurdan çi estbî se ameyî hedefgirewtiş. Şaristanî ameyî veşnayîş, berê dîrokî werte ra ameyî wedarnayîş. Erjê kultirî ameyî çinîkerdiş. Ger ke wina bêro destgirewtiş encax Qirkerdişê Enfalî bêro famkerdiş. Ya zî sewbî hawa nê qirkerdişî nînî famkerdiş.”
Ganî efû biwazo
Seîd qalîkerdişê xo de eleqe ant kemayîyê hukimatî ser û qalîkerdişê xo wina peynî kerd: “Lazim o dewleta Iraq wehşetê ke kurdan ser o ameyo kerdişî vera lêborînî biwazo. Çimkî çîyê ke ame serê kurdan sucê merdimatî yo. Hîroşîma û Nagazakî de çi qewimya se Enfalî de zî eynî çî bi. Dewleta Iraqî hîna lêborînî nêwaşto. Ganî hukimatê heremî zî ser dewlete de zextan bivirazo. Çimkî hetê kurdewarî de çi esto se amebi hedefgirewtiş û tede qirkerdişî ameyî viraştiş.”
DÎREN ROJ / ANF