Rojnameyê Ozgur Gundemî 30ê gulana 1992î de dest bi weşanî kerd û roja ke rojname dest bi weşanî kerd ra nata bombeyî, qerarê padayîşî, qetilkerdiş û tewqîfkerdişî nêqedîyenî. Labelê her çiqas ke hende zext û zordarîyî rojnameyî ser de benî, reyna zî rojname heta roja ma ya ewro estena xo domnayo. Weşanîyayîşê rojnameyî ra 8 rojî ra dima Muxabîrê rojnameyî Hafiz Akdemîr 8ê hezîrana 1992î de hetê hêzanê tarîyan ra ame qetilkerdiş û ewro serrgêra 25. ya qetilbîyayîşê Akdemîrî ya. Akdemîr qetilbîyayîşê rojnameger Cengîz Altûnî ra zaf bitesîr beno û karê xo domneno. O wext derheqê Hîzbulkontra û hêzanê tarîyan de xeylê xeberanê muhîman amade keno û cok ra beno hedefê hêzanê tarîyan û o zî sey qetlîyamanê bînan pey ra gule dîyeno eyî ro û wina yeno qetilkerdiş.
Babete ser o Verfekê Înîsîyatîfê Rojnamegerê Azadan Hakki Boltan û Hayrettîn Çîçekî qisey kerdî.Boltanî va ‘o wext îqtîdarî dewan veşnayêne û xeylê neheqîyan kerdêne û seba ke nê neheqîyî nêrî dîyayîş, hêrişê rojnamegeran kerdêne’ û wina domna: “Akdemîr zî na çarçewa de ame qetilkerdiş. Akdemîr o wext bi qelema xo ya bihêze zaf ameyêne heskerdiş. Waştî ke bi qetilkerdişê Akdemîrî rojnameger û rojnamegerî bitersnî ke wa ti kes herême de rojnamegerî nêkero. Labelê eksê fikrê înan de bi qetilbîyayîşê Akdemîrî ra dima rojnamegerî tayîna cayê xo de ronîşte. Qeleme û makîneya fotografî ya ci erd de nêmendî. Ewro herinda ci de bi hezaran kesî estî.”
Eynî zîhnîyet esto
Boltanî va ‘her çiqas ke qetilbîyayîşê Akdemîrî ser ro 25 serrî derbaz bîyî, reyna zî vera rojnamegeran de eynî polîtîkayî yenî domnayîş’ û wina domna: “No zîhnîyet têk şîyo, labelê no zîhnîyet de israr kenî. Zîhnîyeto ke destûr nêdano bedilîyayîş bibo, bi îmha û înkarî rojnamegerî hedef gêno. Ê zî baş zanî ke nêyî netîce nêgênî. Nêyî tena vera kurdan de nê, vera her kesî de xebetnenî.”
Dejê şarî hîs kerdê
Hayrettîn Çelîko ke o wext muxabîrê Ozgur Gundemî yê Êlihî bî, wina va: “Akdemîr bi vindetişê xo merdiman ser de tesîr kerdêne. Akdemîr her kesî rê rêze girewtêne. O tena xebere taqîp nêkerdêne, dej û derdê şarê kurdî zî hîs kerdêne. Seba ke taqîpkarê heqîqetî bî, hetê îqtîdarî ra tim hedef ameyêne girewtiş. Roja ke polîs û kontrayan tehdît nêkerdênê, çinêbî. Nê hêzê tarî û kontrayan her roje ser kar de bî û roja ke merdimî nêameyênê qetilkerdiş, çinêbî.”
Dosya temam nêbîye
Çelîkî dewamê qiseykerdişê xo de wina va: “Akdemîrî derheqê hêzanê tarîyan ser de dosyayêk amade kerdêne û dosya ver bi qedîyayîşî de bîye. Akdemîr na xebata xo ser o bî hedef. Çimkî verê ke bêro qetilkerdiş ameybî tehdîtkerdiş. Tim tehdîtî ameyênê nuştiş û binê berê ma ra erzîyayênê zere. Hîna dosya tamam nêbîbîye û 8ê hezîrane de ame qetilkerdiş.”
DÎHABER/AMED