Serê qedexeyê tebervejîyayîşê kuçeyan yê Cîzîrî ke 14ê Kanûna 2015î de amebî îlankerdiş ra 3 serrî derbaz bî û qedexe 79 rojan dewam kerdbî. Qedexe de bi seyan kesî cuya xo vindî kerdî û xeylê kesî zî birîndar bîyî. Qedexe de domanî bîyî hedefê guleyan, cuya xo vindî kerdî û birîndar bîyî. Nînan ra yew zî Zîlana 7 serrî ya. Zîlane wextoke tewrê dayîka xo şîyêne dikan bîye hedefê guleyan û nika seba amelîyato diyîn xo amade kena. Zîlane rayîrşîyayîşî de zehmetîyan ancena. Babete ser o dayîka Zîlane Hamdîye Yîgîte qisey kerde.
Hamdîye Yîgîte derheqê hedîseyo ke 15ê çeleyê 2016î de taxa Yasef de ame cuyayîş de qisey kerde û va: “Polîsî ameyî taxe û vatî ‘Ma keye de cigêrayîş kenê’ û kewtî keyeyan. Ma zî teber de vindertî. Kêna mi zî waşte ke şêro market. Mi zî polîs ra pers kerd. Ey zî va ‘beyraqa sipî bigî û şo’. Ma şî dikan pey ma ra vengê guleyan ame. Wayîrê dikanî rema. Ez, kênaya xo û çend keyeyê bînî dikan de mendî. Guleyêke gina dêsî û dima ra gina kêna min ro. Badê hedîse ma şîyê nêweşxane û uca de çîyêk nêkerdê. Ma eşrawitî Amed. O wext amelîyat bî. Kênaya mi hema zî dermankerdişê fîzîkî vînena. Doktoran va ‘seba birînan esteyî helîyenê’. Hema pîze û pişîya kêna min de birîn estê.”
ŞIRNEX