Ma demserrê wisarî û aşma nîsane de yî. Û aşma nîsane hetê varanî ra aşma bereketî ya. Varan na aşme de xo de qusir ver ra nêdano. Herre na aşme de varanî ra mird bena. Binê herre, binê erdî, awê binê erdî awe ra pir/kîp benî. Eke wisarî de varan zaf varo û binê erdî pir bibo, o wext hamnan tenganîya awe nêanceno. Eke wisarî de varan tam nêvaro hamnan zaf zehmet û çetîn vîyareno. Û ganî ma varayîşê varanê wisarî ra xem nêkerî.
Varayîşê varan ra heme ganîyî havile gênî. Tena herre û erd nê, çi nebat û darî, çi heywan û milçîkî pêro seba varanî ra rizqê xo peyda kenî. Wisar reyna gan dano xozaye ra, seke xoza newe bena. Tabîî zimistanî ra pey seke dinya mergî ra vejîyaya bîya ganî.
Bitexirî ke zimisanî de vewre varaya û heme ca kerda sipî û sipîyî ra vêşêr çîyek nêaseno. Kê kotî ra, kamder hetî ra biewnî rengê sipîyî est o. Kê vanî qey xoza merda. Çimkî dormeyî de çîyo ganî çin o ke çîmdê kê bigino. Heme ganîyî paweyê germ û wisarî yî. Ameyîşê wisarî ra xoza bêvengeyî ra xelisîyena heme ca veng û rengî reyde xemilîyeno. Vengê milçîkan û kerm û keyzan kêmî nêbeno. Xoza venganê ahengan reyde coş û kelecanê xo dana teber.
Vengan û rengan reyde kê zanenê ke dinya ganî ya û ganîya xo tewir tewir vilik, nebat û heywanan ra îspat kena. Eke kê nê xoaqilîyayîşê xozaye bi goreyê merdiman tadî, ganî heme demserrê mîletan zî bibo. Eke kê qiymetê mîletê xo nêzanî, mîletê kê tim demserrê zimistanan ra bivîyaro û xo ra xeyr nêvîno. Timûtim zimistanî de bîyayîş, timûtim mîyanê zordarî û zulimî de bîyayîş o.
Beno ke kê heyanê tenganî nêancî reheteyî nêvînenî. Zimistandîyîşî ra qedr û qiymetê wisar û hamnanî hîna baş fehm beno. Nê semedî ra timûtim zimistandîyîş çarenûsê mîletî yan zî mîletan nîyo. Heme mîletî demserranê wisar û hamnanî heq kenî. Beso ke xo zordarî û zulmî ra bixelisnî. Xo denêkerî binê serdestan û kolonyalîstan.
Kam mîletî ke zulmî ra sereyê xo hewanayî peynî bi peynî ser kewtî. Zordar û zulimkaran erdanê xo ra def kerdî. Nêwaştî bindesteyî de bimanî, koleyî qebul nêkerdî. Eke kê koleyî qebul bikerî her roja kê, her aşm û serra kê timûtim seke zimistanî xidar vîyarena. La mîletê ke azadeyî ra fek ver ra nêdayî suhidê xo bedilnayî. Suhidê xo têkoşînî reyde bedilnayî. Cayê xo de roniştişî reyde azadîyê xo nêzeynayî. Azadî waşt û têkoşînî dayî.
Her mîlet beno ke ge ge tenganîyan bianco û nê tenganîyî zî cuya mîletan de ceribîyayîş î. Ceribîyayîşî mîletan kamîl kenî û kamîl kenî ke reyna ê şaşî û xeletîyan nêkerî. Zaf mîletî tarîxê xo yê vîyartişan ra zaf dersî girewtî. Nê dersan reyde gamê xo hîna peymawite eştî. Xo hîna leze bela û gosirmetan ra raynayî/xelisnayî. Tarîxî de na hawa zaf serebûtî est î. Her yew serebût zî seke şîret o.
Temenîyê ma o yo ke her mîletî bi goreyê edet û cuya xo biciwîyî. Xo azad bivînî, xo azad bidî şinasnayîş û bindestî qebul nêkerî. Bindestî qebulkerdiş her tim cuye de cuya zimistanî qebulkerdişo. Cuya zimistanî qebulkerdiş xo çinkerdiş û vînîkerdişo. Hêvîye o yo ke zimistanî ra pey wisar o, bindesteyî ra pey azadeyî ya.