Zîndanan de polîtîkayê heyfgirewtişî

Parlamentera HDPYî ya Mêrdînî Pero Dundare qala zext û tedayê zîndanan ke grevê vêşanîye û rojeyê mergî ra dima xeylê zêde bîyî kerde.

Dundare va ‘problemê zîndanan 12ê Êlule ra nata qet rojeve ra nêkewtî’ û wina domnaye: “Îqtîdar hewl dano hêzê xo hepsîyan ser ro nîşan bido. Vera naye de hepsîyî zî xoverdayîşanê tarîxîyan nîşan danî. Tewr peynî grevê vêşanîye û rojeyê mergî ra dima zextî hîn zêde bîyî. Hepsîyê ke nêşênî tena sereyê xo bimanî, tena yenî verdayene. Zîndanan ra cenazeyî vejîyenî. Sebebê nînan heyfgirewtişê îqtîdarî yo.”

Dundare dewamê qiseykerdişê xo de wina va: “Xeylê zîndanan de heyetê cigêrayîşî nînî qebulkerdene. Xora HDP zîndanan de yeno astengkerdene. Ti parlamenterê ma nêşêno şêro zîndan. Wina kenî ke sere raştîyan padî. Sere de Îmrali û zîndananê bînan de zextî xeylê zêde bîyî. Ma tewr zaf wazenî hepsîyê nêweşî serbest veradyî. Labelê reyê AKPyî reyde yeno astengkerdene. Bitaybetî paketê huqûqî reyde tayê çî do biameyêne kerdene. Labelê o zî ame taloqkerdene. Ma do no het de têkoşînê xo bidomnî. Ganî komel hîna zaf hesas bibo. Ma do têkoşînê xo bidomnî û seba ke heqîqet bivejîya raşte, çi destê ma ra bêro ma do bikerî.”