Her roje zîndananê cîya-cîyayan de hepsîyî raştê zext, teda û îşkenceyan yenî. Bitaybetî 15ê Temmuze ra dima zext û îşkenceyî xeylê zêde bîyî. Nê zîndanan ra yê ke tewr zaf vejîyeno aver ra yewe zî Zîndanê Tîpa Myî yê Bayburtî yo.
Cinîya bi nameyê Nudem Duraka ke vatişê deyîran ver bi îdîaya ‘propagandaya rêxistine kerdene’ ra ameybî tewqîfkerdiş, pêvînayîş de qala zext û îşkenceyê zîndanî keyeyê xo rê kerde.
Babete ser o dayîka Nudeme Hatîce Durake qisey kerde. Dayîke Durake dîyar kerde ke seba ke zîndan dûrî yo, ê nêeşkenê şêrî pêvînayîşê kênaya xo û wina dewam kerde: "Bi aşman ra dima ez bi wesîleya roşanî şîya pêvînayîşê kênaya xo û kênaya mi pêvînayîş de mi ra va ê her roje rastê tedayan yenî. Qawîşo ke 68 cinîyî tede yê bi hawayêko sîstematîk her roje îşkence bi hepsîyanê cinîyan yeno kerdiş."
'Hepsîyî xeta ma ya sûr î'
Dayîke veng daye ÎHD û raya pêroyî û wina va: "3 serrî yo kênaya mi zîndan de yena tepiştiş. Do 18 serrî zî bimano. La tedayanê zîndanî ver 18 serrî nê 2 aşmî zî nêeşkena biqedêno. Zîndanan de îşkence tena kênaya mi rê nîno kerdiş, temamê hepsîyanê cinîyan rê yeno kerdiş. No semed ra ez veng dana herkesî ke wa wayîrê hepsîyan bivejyî.”
BAYBURT