Dema perwerdeyê serra newî de seba mektebanê kurdkî zî zingilî cenîyay. Amed de Mektebê Seretayî yê Ferzad Kemanger vizêr destpa dema perwerdeyê serra newî kerd. Destpa kerdişê perwerde de heyecana wendekaran hayr ant.
Tirkîya de emserr zî mektebî demê perwerde yê 2016-2017 bi polîtîkayanê asîmîlasyon û înkarî destpa kerdî. Dûştê mufredatê asîmîlasyonîst yê perwerdeyê mektebanê tirk, mektebanê kurdkî zî destpa perwerdeyê serra newî kerd. Amed, Gever û Cizîr de verîya hîrê serran seba perwerdeyê bi ziwandê kurdkî mektebî abîyay. Mektebê Seretayî yê Ferzad Kemanger ke serra 2014î de qezaya Amed Rezan de seba gedeyan (doman) abîya vizêr destpa serra perwerdeyê newî kerd. Nika mektebî de pêro pîya 238 wendekarî ders vînenê û 18 malimî zî dersan danê.
‘Ma bê alternatîf nîyê’
Dema newî yê perwerde 2016-2017î bi tewrbîyena wendekaran û bi heyecaneke gird abîya. Malbatan vizêr seatanê sodir de gedeyê xo berdî mektebî û ver mektebî de are bî. Merasîma akerdişê dema newî yê perwerde de Hemseroka KCD Leyla Guven, Parlementera Agirî yê HDP Dîlan Dîrayet Taşdemîr, Rayveberê KURDÎ-DER, HDP, DBP ra pîya malbatê gedeyan zî hadre bî.
Hemseroka KCD Leyla Guven merasîma akerdişê dema newî yê perwerde de qisey kerd û seba perwerdeyê bi ziwandê dayike kêfweşî û şabîyayişê xo ard zon. Guven hayr ant malimanê Egîtîm Senî yê ke karî ra dûr amey vistiş ser û aşkere kerd ke ê bê alternatîf nîyê. Guven vist vîrî ke iyê dê perwerdeya ziwanê mayî bidê wendekaran. Hemseroka KCD veng da malbatan û va: “Ma wazenê ke malbatî bi gedeyanê xo ra bi kurdkî qisey bikerê. Wa pêrokîn malbatî gedeyanê xo birişê mektebanê kurdkî û înan keye de zî bi kurdkî perwerde bikerê, biresnê.” Leyla Guven hayr ant name û kamîya Ferzan Kemanger ser û va no nameyekê zaf muhîm o. Guven da zonayen ke iyê dê nê nameyan û kesayetan bidê pawiten.
238 wendekarî estê
Badê qiseyanê Guven, zengila dersan da piro û gedeyî bi rêzî ravêrdî mektebanê xo. Mektebê kurdkî yê Ferzad Kemanger de do heta aşma hezîrana 2017an dersê bi ziwandê kurdkî û xêlê dersê bînî bîrê dayen.
Mektebê Seretayî yê Ferzad Kemanger de 50 wendekarê 2 polê verdibistan, 60 wendekarê pola yewîn, 65 wendekarê pola diyîn, 63 wendekarê pola hîrêyîn estê. Pêro pîya 238 wendekarî no mektebî de ders vînenê û 18 malim (mamoste) zî dersan danê. Rexmo ke demê perwerdeya newî destpa kerd, la serpirodayişê qeydê mekteban hona zî ramenê.
DÎHA / AMED