Kurd û hêzê demokratî bi rojan o sere de Amed, Wan, Mêrdîn û Dêrsim de û welatanê Ewropa de payan ser o yî û xespbîyayîşê şaredarîyan protesto kenî. Çalakîya Amedî roja 17. de dewam kena û çalakgêran bi siloganan protesto kerd û dîyar kerd ke ê do bi xoverdayîşî qezenç bikerî.

Vera tayînkerdişê qayûm û xespkerdişê şaredarîyanê bajarê girdî yê Amed, Wan û Mêrdînî de hêrs û reaksîyonî dewam kenî. Sere de Amed, Wan, Mêrdîn û Dêrsim de û xeylê welatanê Ewropa de çalakîyê protestoyî dewam kenî.

Bajarê Amedî de roja 19ê Tebaxe ke qayûmî ameyî tayînkerdene û şaredarîyî ameyî xespkerdene ra nata çalakîya protestoyî dewam kena. Çalakîye roja 17. de ya û vizêr çalakgêrî reyna Cadeyê Lîseyî yê qezaya Yenîşehîrî ya Amedî de ameyî têhet. Parlamenterê HDPyî yê Garo Paylan, Mûsa Farisogullari, Feleknas Ûca, Erdal Aydemîr û xeylê kesî beşdarê çalakîye bîyî.

Kesê ke beşdarê çalakîye bîyî bi cinitişê fîtikan, çepik û tilîlîyan xespkerdişê şaredarîyan û tayînbîyayîşê qayûman protesto kerd. Çalakgêran çalakîye de siloganê ‘Ma do bi xoverdayîşî qezenç bikerî’ eştî.

Dêrsim de çalakîya roniştişî dewam kena

Rasteyê Seyîd Rizayî yê Dêrsimî de bi rayberîya Partîya Demokratîke ya Şaran (HDP) de 5 rojî yo ke çalakîya protestoyî yena kerdene. Çalakîya ke hemserekê HDPyî yê bajarî û xeylî hemwelatijî tewrê ci bîyî, hemserekê partîye yê bajarî Hidir Çîçekî qisey kerd. Çîçekî bale ante polîtîkaya hêrişkare ya hukmatî ser û wina va: “Çend şino welat hîna keweno tengayî, ganî hukmat cade na polîtîkaya xelete ra agêro.”

Îmraparatorîya tersî yena awankerdene

Çîçekî dewamê qiseykerdişê xo de va ‘16 rojî yo ke şaredarîyê ma ameyî xespkerdene’ û wina domna: “No problem tena problemê HDPyî nîyo. No problemê demokrasî yo. Şîyayîşê welatî baş nîyo. Merdimî mehkûmê vêşanî û feqîrîye yenî kerdene. Îmraparatorîya tersî yena awankerdene. Kursê Quranî de 20 domanan rê tecawiz ame kerdene. Ka qet rojnameyan de ame dayene? Eke welatêko bîn de bibîyêne, îdarekaran îstîfa kerdêne. Labelê ma de tersê ci yeno kerdene. Dizdê yena meşrûkerdene û ruşwet zî sey çîyo normal yeno dîyayene.”

Dimaye qiseykerdişê Çîçekî çalakîya roniştişî ameye viraştene.

 

AMED