Bi xurtbiyayişê têkilîyan, civat aver şîno. Miyanê civatî de kesayetî viraziyena. Eke merdimayî ewro erasawa na zanayî û averşîyayişî, zafêrî rist û giringiya ziwanî ra ya. Di averşîyîşê dîrokî de ziwanî cayêko zaf giring girewto. Ziwan hîmê merdimbîyayiş û zanayişî yo.
Çiyoke merdim û giyanîyêy bînan yewbînîy ra ciya keno ziwan o. Merdim bi vatiş bi merdim, bi vajîyayiş bi civat û bi ziwan zî bi şar. Zanayişî, bi namekerdiş dest pê kerd, namekerdişî zî bi çekûye. Çekûye bî hîmê namekerdiş û naskerdişî. Namekerdiş û naskerdiş zî bîy hîmê zanayişî.
Şaranê ke ziwanê xo vînî kerd helîyay û şarîtîya xo zî vînî kerde. Înê ke ziwan pawit û axa xo vînî kerde, di serdemêko bîn de, reyna bîy wayir axa xo. Di dîrok de zafêrî nimûneyêy naye est ê. Şaro kurd, di miyanê koma diyine de wo. Yanê ziwanê xo pawit la axa xo vînî kerde.
Di dîrok de kemî doran bi destserdar û wayir dewlete. Axa kurdan semedê weşî û zengîneyîya xo tim û tim, bî cayê şer û qewmyayişan. Amî perçekerdiş. Perçebîyîşê axe, bi sedemê perçebîyîşê ziwanî zî. Şaro kurd di bin destserdarîya şar û çandanê bînan de mend. Carna ame înkarkerdiş û carna zî, ziwanê ey ame qedexekerdiş. Labelê, kurdan qet ziwanê xo ra fek vera nêda.
Her nifşe no ziwano qedîm, bi awayêko, perçekerde bo zî, resna nifşa xo ra dim û şarîtîya xo, da domnayiş. Eke ziwanê xo vînî bikerdayê, xora ewro, yew nêşîkayê behsê kurdîtîya xo bikero.
Ewro, kam ke fekê xo akeno, ziwanî bi zagonan ra gire dano. Ziwan ma fêko xozayî yo, bi zagonan ra, nîno giredayiş. Ziwan, verîya zagonan est be. Ameyî yan zî bikarardiş û bikarnêardişê ti ziwanêke, bi zagonan nîno, nîqaşkerdiş. Bi ziwanê daye, perwerdeyîye zî hina ya. Perwerdeyîya bi ziwanê daye nîna nîqaşkerdiş.
XOSER WELAT