Ewro serrêgera yewine ya şehadetê Zulkuf Gezenî ya. Min zî seba çalakîya ey a bi vateyî ser o no nuşt, nuşt. Çimkî embazê Zulkufî min nêzdî ra şinasnaynê. Serra 2006î de taybetî Surê Amedî de averşîyayişê muhîm qewimyaynî, çimkî bi hetkarîya dewlete sey çeteyê Hîzbullahî peynî beşdarê ya DAIŞ ya zî EL Nusra bîyê. Binê nameyê sazîyê STKyan, Sur de yew bi yew banan ya girewtê ya zî kîra kerdinê. No dem min zî Meclîsê Hemwelatijê Azade yê Hasirliyî de xebat kerdinî. Ma taybetî bi qewetê xo persigirikê şarî yê taxe reyde elaqadar bîynî.
No qerar da bî do tecrîd bişikno
Misal taybetî taxa Hasirliyî de ceyran zaf şîynî ma zî sifte seba çareserîya nê persgirikî çalakîyêk organîze kerd, çalakî ra heme dormeraya fikrî ra taxijî beşdar bîyê. Ma çalakîya ceryanî açarnabî, çalakîya tecrîdî, çalaki de ma bêmîyan sloganê Wa Biciwo Serek Apo qiraynî. No dem Zulkuf Gezen zî ray ray ameynî Meclîsê Taxa Hasirliyî. Mîyanê gêrayişî de bî, waştinî şar û rêxistinî ra xizmet biko. Ma ray ray ci reyde teraqnaynî. Seke no dem ra qerar da bî ke şikitişê tecrîdî ra bibo çila. Yew dem ra pey ma vîna ke Meclîsê Hasirliyî ciwanan ra nêbeno cewab no ser ma taybetî bi ciwanê taxe ameyî têhet û ma qerarê ronayişî seba ciwanan komelêk da.
Mîyanê 2006î de ma Komela Ciwanê Demokratîke awan kerd. Ronayişî ra hetanî girewtişî ra komela ma bî hedefê hem dewlete hem zî dormeya ra çeteyê Hîzbullahî. Çimkî ma heme planê înan ê mêtingerê ciwanê Kurd vila vet bî. Zulkuf Gezen komela ra zî ameynî şîynî, ma ra lomeyê xo ardinî ziwan şima zaf bi pasîf ê, ganîya ke çalakîyê fedaî bêrî viraştiş. Ma zî ci ra vatinî armancê na komele rêxisitinkerdişê ciwanan o. Çimkî ciwanan nika bîyê hedefê dewlete ganî ma înan bixelisnî. Min Zulkufî ra vat ke ti eşkenê nê adirê xoverdekarê xo bi xebatê kultirî hîna aver bibê. Peşnîyazê min ser Zulkuf şî Komela Dîcle Firatî ke merkezê xebatê kultirî bî. Êdî Zulkuf destê xo de bi gîtar gêraynî û deyrê şorişî ardinî ziwan.
Çalakîya Zulkufî veng ard
Yew dem Zulkîf nêame komela ma, ma zî no maben de lez dayê, xebatê xo la yew şewe çeteyê Hîzbullahî gule veradayê sazîya ma û dewlete zî operasyon kerd, nê çare sazîya ma ame girewtiş. Serra 2007î de peynîya girewtişê sazîye rojêk xeber ame ke Zulkuf Kuçeya Çarlingî de çalakîyêk viraşto û çalakî de polîsêk merdo. Zulkufî ra cezaya 2 ray muebbetî ame dayiş. Embazê ke seba pêvînayişê şînê hepisxaneyî vatinî; Zulkuf qet cayê xo de nêvindeno, seba averşîyayişê xo her tim kitabê Rayberê Ocalanî waneno, seba şikitişê tecrîdî zî bêvengîya ra nêrehet o.
Çalakîya Guvene roşn kerd
Hemsereka KCDî Leyla Gulen vera tecrîdî hepisxanaye de dest pê çalakîye kerd û peynî zî çalakîya Guvene pêroyina Kurdistan, Tirkîya û Ewropa ra vila bî. Zulkuf zî seba hetkarîya na çalakîye 1ê adara 2019î kewt çalakîya mergî. Na çalakî seba Zulkufî çalakîyêka pasîf bî, no ser şewa 16ê adare çalakîya xo açarna, çalakîya fedaîyî û seba azadîya Rayberê Şarê Kurd Abdullah Ocalanî cuya xo da. Dewlete nêwaşt çalakîya Zulkufî, sey çalakîya fedaîyî bêro dîyîş, no ser dozgerî vat; Zulkuf xo bi la elaqnayo. Embazê ey agahî dayî ke Zulkuf seba şikitişê tecrîdî xo kerd çila. Merasîmê cenazeya Zulkufî ra zaf kesî beşdar bîyê û wayîrê şehîdê xo vejyayê.
Peynîya çalakîya Zulkufî, hepisxaneyê Gebzeyî de Ayten Beçet, Hepisxaneyê Erziromî de Zehra Saglam, Hepisxaneyê Mêrdînî de Medya Çinar, Hepisxaneyê Osmanîye de Siraç Yuksel û Hepisxaneyê Şakranî de Yonca Akici, Hepisxaneyê Xarpêtî de Mahsum Pamay seba şikitişê tecrîdî sey Zulkufî çalakîya fedaî kerdê. Bi çalakîya nê fedaîyan tecrîd şikya û dewlete nêçare Rayberê Şarê Kurd Abdullah Ocalanî reyde pêvînayişî ra destûr da û Rayber Ocalan zî çalakîya Zulkufî silam kerd. Ma çiqas çalakîya Zulkufî pêşnîyaz nêkerî zî goreyê no demî çalakîya Zulkufî, çalakîyêka bi rûmet û fedaîyî bî.