Yew mesela esta. Nameyê mesela “Kam zêdeyîr zûrker o.” Di dewan de, di zûrkerî benî. Nê zûrkeran ra yew zûrker dewe xo de yew dîwan de qisey keno û vano;
- Yew kalikê mi bibî.
Lîyêk (qazan) eyê bibî. Çend sifircî lîyê kalikê mi sifir kenî, wexto ke çakuçan danê pêro, vengê çakuçanê înan nêşino ayê bîn. Dewijî na meselaya zûrî goştarî kenî vanî; Meseleya kalikê to çîyêk nîya.
- Dewa bîn de yew merdim esto, meseleyê eyê hîna baldarîyê. Nê qisey ser merdimek wirzeno şino dewa bîn, wazeno merdimo bîn yê zûrkerî bivîno.
Şino dewe, dano bere (kêber) merdimî ra, lajê merdim vejîyeno vere berî. Merdim perskeno vano;
- Babîyê to ça de yo?
Lajêk vano;
Asmê dirîyayo, bawê mi şîyo biderzo. Lajêk senî hina qisey keno, zurkera dewa bîn xo bi xo ra vano;
- Eke lajêk hina qisey keno, babîyê lajêk hina zurkerêk zaf pîlo. Çîyo ke mi dî beso. Hewce nêkeno ez bawê lajêk bivînî. Ez şerê keye hîna hol beno. Agêreno şino keye xo.
Zûrkerîya R.Tayîp Erdogan û Ehmed Dawîdoglî gore na mesela hîna girda. Wexto ke endame TAK’î Abdulbakî Somer Enqere de çalakîya fedayî viraşt, qelbê dewleta tirk de da tirkanî rê. Qisasê şehîdane Cizîra Botan, Silopîya û Amed-Sûr girewt.Ser ra çend derbas nêbî, Erdogan û Dawîdoglî dest bi zûran kerd. Her di zûrkeran vat ke, ayo ke çalakîya Enqere kerda, nameyê eyê Salîh Necar o, YPG’yij o. Hina bi ke, veng da Amerîka û dina û vat, ha biewnê YPG sekerdo! PYD se kerdo!
Her roj eynî qise reyna vat û vat. Erdogan’î hina şîrretî kerd ke, bi Barack Obama yewbîdîyayîş zî kerd. La peynî de Amerîka zî teqîya û va, “Ma YPG rê bawer kenê.” Yane vat ke, R.Tayîp Erdogan û Ehmed Dawîdoglî zûran kenî. Çalakîya Enqere, PYD-YPG û Salîh Necar nêkerda. Medyayê AKP zî seba zurên R.Tayîp Erdogan û Ehmed Dawîdoglî pîne bikerenê, şerê psîkolojîk kerd. Nuşteyan de fotoyê Abdulbakî Somer sey fotomontaj nîşanda.
TAK ser şerê taybet yê medyayê AKP, fotoyêk bîn yê Abdulbakî Somer (Zinar Raperîn) weşîna. Zûrkerî reyna cayê xo de nêvindayê. Bawê Şehît Zinar Raperîn berd û seba testê DNA bikerenê, gonî eyê girewt û berd Adlî Tibba xo de testê DNA kerd. Testê DNA de reyna vejîya werte ke, nasnameyê Abdulbakî Somer raşto. Yane pê testê DNA zûrkerîya R.Tayîp Erdogan û Ehmed Dawîdoglî ame morkerdiş.
Nika dinya pêro hesîyaya ke, Erdogan û Dawîdoglî zûran kenî. Beno dinya gore menfaete xo dewleta tirkî ra eleqê virazena. La herkes zano ke rayverên dewleta tirk bi taybet AKP’yî zûran kenî. Xora R.Tayîp Erdogan û Ehmed Dawîdoglî heta nika derheqê Kurd û Kurdistan’î de çi qisey kerdo, pêronê qiseyê înan zûrî vejîyayê. Komkiştişan kenî, vanê ‘ma nêkerdo, kurdî bi xo, xo kişenê’. Zurê ke Erdogan û Dawîdoglî kerdî, bîrê nuştiş, kitabî bes nêkenî. Zûrê înan bi desan kîtaban kenî. Yane, zûran kenî, boçan zî nanê pa. La se bikerenê herkes zano Erdogan zî zûrkero, Dawîdoglî zî zûrkero.