ERGÎN ÇAGLAR / MA / EDENE

Bi ameyîşê zimistanî nêweşîyê ke girêdayeyê tayê vîrusan benî zî her ke şono zêde benî. Merdimî vera nê nêweşîyan de çareyê pawitişî gêrenî. Etar û çerçîyê ke qezaya Seyhanî ya Edene de Sûka Misirî de nebatan roşenî, no het de nebatan pêşnîyaz kenî.

Çerçîyan ra Seyfî Degîşmezî va ‘bi ameyîşê zimistanî êdî hewa de bedilîyayîşî benî’ û wina domna: “Cok ra xoverdayîşê wucidê merdimî keweno û ma benî nêweş. Seba ke ma no mewsîm de nêweş nêkewî ma nebatanê sey zencefîl, zerdeçal, adaçayi û helawa himroyan merdiman rê pêşnîyaz kenî. Wa ti kes darûyanê kîmyewîyan bikar nîyaro. Nê darûyî merdimî baş kenî, labelê benî sebebê tayê çîyanê bînan. Xora darûyê kîmyewî merdimî bi hawayo demkî baş kenî, labelê nebatî wina nîyî.”

Çerçîyan ra Ozgun Bîçerî zî va ‘xeylê çîyê ke ma wenî yan zî şimenî, hormonin î. Cok ra nêweşîyî bi hawayo asan kewenî wucidê ma. Darûyî nêweşîyan ra dima yenî bikar ardene, labelê nebatî wina nîyî. Nebatî vernîya nêweşîyan gênî. Nika kîloyêk exlamurî 150, yê babune 80, adaçayi 50 TL yo. Ma eşkenî goreyê 3 an zî 5 TLyî biherînî û xo nêweşîyan ra bipawî.”