Hemseroka DBP Sebahat Tûncel 4ê Mijdare de wextê protestokerdişê rehîngirewtişê wekîlanê HDP de amê binçimgirewtiş û roja verî tepêşîya. DBP, HDP, KJA û KCD rehîngirewtişê Tûncel û wekîlanê HDP rê nêrazîbîyen damûsna. Damûstayîna ke Buroya Şewirmendiyê yê DBP ya Amed de amê dayen de  Hemseroka KCD Leyla Guven, Hemserokê Pêroyî yê DBP Kamûran Yuksek, Endamê KJA, parlementerê HDP ra pîya xêlê kes tewr bî.

Kamûran Yuksek ke damûstayîn de qisey kerd û vist vîrî ke Tirkîye bi cûnta yena îdare kerdiş, derbeyekê esta ke hetê AKP yena rayveberdiş  û va hiqûq zî hiqûqa derbe ya. Yuksekî da zonayen ke demê peynî de bi hezaran endam, rayveber, emegdar, malim amey binçimgirewtiş û tepiştiş û şaranê Tirkîye ra waşt ke raştîyan bivînê. 

Merkezê derbe de Kurdî estê

Kamûran Yuksekî vist vîrî ke çapemenîya sosyal û pêrokîn dezgehê çapemenî înan rê ameyê girotiş û wina dewam kerd: “La rexmê nê manîkerdişan ma dê  keye bi keye bigeyrê û pêvacoyî bivajê. Merkezê derbe de ma, şarê Kurd esto. Wazenê îradeyê şarê Kurd bişikînê. Heta nika 30 hemşaredarê ma kar ra amey vetiş û qeyûmî amey tayînkerdiş. Bi derbeya dûştê HDP ya ke 4 Mijdar de zî ame waşten ke HDP vejerê teberê meclîsî.  AKP wazeno vajo ke ‘cayê şima meclîs de çinyo.”

Hemserokê DBP Kamûran Yuksekî aşkere kerd ke hesîr girewtişê Hemseroka DBP Tûncel zî nîşandayişê hêrişanê dûştê Kurdan o.  Yuksekî da zonayen ke AKP fikir kena ke Rojhelatê Mîyanî de senî vernîya Kurdan bigîro û manî bikero û va, him zerre de him zî teberê welatî de verra Kurdan hêrişeke esto. 

‘Ganî AKP şaşî ra ageyro’

Yuksekî vist vîrî ke Tirkîye ver felaketekê de ya, verva letebîyayişî şina û wina dewam kerd: “Yê ke ganî şaşî ra ageyrê AKP bi xo ya. Bi raybazanê serranê ’90î nêşkenê Kurdan raya ci ra açarnê. Tekoşîna ma do bi israr dewam bikero û ma dê nê qadan teslîmê AKP nêkerê. AKP do bin kerdenanê xo de bimano.”

Yuksekî hayr ant şiklê binçimgirewtişê Sebahat Tûncel ser û aşkere kerd ke îradeyê 106 şaredarîye ke bi reyanê bi mîlyonan amey weçîntayiş erdî ra yeno kaşkerdiş û yeno binçimgirewtiş. Yuksekî dûştê hêrîşan mesaja xoverdayişî da û va, ma dê heta peynî tekoşîna xo biramnê. Yê ke serkewê ma yê. 

Hewldayenê sîyaset ra tesfîyekerdişê cenîyan

Endama KJA Fatma Kaşan zî hayr ant hêriş û şîdeta dûştê endamanê KJA ser û nayî zey hewldayenê sîyaset ra tesfîyekerdişê cenîyan hesibna. Kaşan aşkere kerd ke AKP destûr nêdano ke cenî cenî tewrê sîyaset û civakî bibê û va, ‘Sîstema netew dewlet serbestîya cenîyan red kena û hewl dana ke îradeyê ci qada civakî de çinbikero. Nê hardî, hardê Mezopotamya û Kurdistanî ye.  Ser no hardî dûştê zihnîyeta serdest ê camêrdî, cenîya demokratîk esta. Zey cenîyê kurd ma no rol û mîsyon giroto ser xo.”

Fatma Kaşan da zonayen ke zey cenîyê Kurd iyê dê kuçe, sûk û her ca de wayrê îradeyê xo bivejyê û bi xoverdayişê xo yê polîtîk dûştê faşîzmî vinderê.   


 ANF / AMED