Mexmûr da zanîn ku pêwîst bû di nava 10 rojan de, sekreteriya kongreyê bihata ba hev û ew jî çênebûye. Sekreterê Giştî yê YNDK'ê Xefûr Mexmûrî li ser sedemên taloqkirina Kongreya Neteweyî ya Kurdistanê ji DÎHA'yê re axivî. Mexmûrî wiha got: "Kongreya Netewî ji ber sedemên siyasî hat taloqkirin. Ev nakokiyên siyasî yên di navbera aliyên siyasî de, bû sedem ku kongreya neteweyî bê taloqkirin. Di aliyê teknîkî de jî pirsgirêk hene. Civîn hatiye paşdexistin û heta niha demek jêre nehatiye diyarkirin."


´Divê berjewendiyên neteweyî esas bin´
Xefûr Mexmûrî destnîşan kir ku bi berjewendiyên teng ên hizbî nagihin tu cihan û wiha axivî: "Bi dîtina min ev nakokiyên siyasî yên li rojavayê Kurdistanê hene, bandor li peywendiyên başûr û bakûrê Kurdistanê kir. Em dikarin bi berjewendiyên neteweyî û xebitîna ji bo yekrêziyê bigihîn her cihekê." Mexmûrî bal kişand ser bendek ji helbesta helbestvanê Kurd Ehmedê Xanî û wiha got: "Ehmedê Xanî berî 400 salan wiha gotiye; 'Ger dê hebûya me îtifaqek, Vêgra me bikirya înqiyabek, Rum û ereb û ecem temamî, Hemûyan ji me re dikir xûlamî' Lê mixabin ev 400 sal jî derbas bûn, hê ew yekrêzî di nava Kurdan de nîne. Ev nexweşiya Kurda ye û ti kes yê din qebûl nake. Çima em dijminê xwe qebûl dikin, em hev qebûl nakin?" Sekreterê YNDK'ê da zanîn ku kongre erkekî vê qonaxêye û wiha berdewam kir: "Bi baweriya min kongreya netewî erkekî lezgîn a vê qonaxê ye. Divê hemû aliyên siyasî nakokiyên xwe bixin aliyekê, lê divê sêwanekî neteweyî çêbikin û hemû Kurd di bin de kom bibin. Divê nêrîna me li ser kongreya neteweyî wiha be."

´Yekîtiya Kurdan naxwazin´
Mexmûrî di berdewama axaftinên xwe de diyar kir ku bandora dewletên cîran li ser kongreyê heye û wiha dirêjî da axaftina xwe: "Em bixwazin nexwazin bandora dewletên cîran li ser kongreyê heye. Dewletên cîran tu carî yekîtiya Kurdan naxwazin. Dewletên cîran ti carî ne bi wê yekê re ne, Kurd li hev bikin û bigihin lihevkirinekî neteweyî. Nabe em bêjin bandora dewletên cîran nîne."



NÎHAT KAYA/MİHEMED TAHİR/HEWLÊR/DÎHA