Ewropa de welatê Almanya, Avusturya û Fransa de raydayîşî dest pêkerdî. KCDK-Eye derheqê weçînayîşan de îzehetêko nuştekî daye. KCDK-Eye îzehetê xo de wina vato: “Ganî ma bi hawayo baş bizanî ke eke ma bi moral û motivasyon bibî û kede bidî, ma eşkenî netîce bigîrî. Cok ra wa ti kes nêvajo ‘bi raya mi çîyêk nêbeno’ û wa merdim û dormeyê xo seba raydayîşî îqna bikero.” Welatê Almanya, Avusturya û Fransa de raydayîşî dest pêkerdî. Dîvanê Kongreya Komelê Demokratîke ya Kurdistanî ya Ewropa (KCDK-E) zî derheqê weçînayîşî de îzehetêko nuştekî da û veng da herkesî ke wa herkes şêro sindoqan ser û raya xo bixebetno. Dîvanê KCDK-Eye îzehetê xo de vato ‘7ê Hezîrane saete 9.00î de Almanya, Fransa û Avusturya de raydayîşî dest pêkerdî û heta 19ê Hezîrane do raydayîş dewam bikero’ û îzehet wina dewam kerdo: “Ganî ma her vîste û deqaya xo seba xo resnayîşê weçînitoxan bikar bîyarî.” Dîvanê KCDK-Eye dewamê îzehetê xo de wina vato: “Ganî ma bi hawayo baş bizanî ke eke ma bi moral û motivasyon bibî û kede bidî, ma eşkenî netîce bigîrî. No weçînayîş hetê netîceyî de dîyarker o û ganî ma ferqê nêyî de bibî. Yan dîktatorî yan zî cepheyê demokrasî û azadîye yê şarî do qezenç bikero. Ganî ma keye bi keye, esnaf bi esnaf bigêrî û merdiman dawetê raydayîşê HDPyî bikerî. No wezîfeyê ma yê esasî yo. Yew ray reyde heme çî bedilîyeno û lazim o ma heta 19ê Hezîrane bi heme hêzê xo bixebetyî.” Ganî yê ke nêşîyo sindoq, nêmano Dîvanê KCDK-Eye îzehetê xo de veng dayo heme kurdistanî, armenî, suryanî, tirk, laz çerkes, musluman, elewî, xirîstîyan, asurî, suryanî, cinî, ciwan û muxalîfan û wina vato: “Ganî ma no weçînayîş de seba peynîya dîktatorîye ardiş, hesabê Dayîka Taybete, Cizîr, Sûr, dagîrkerîya Efrînî, Madimak, Gurgum û Pirsûsî perskerdişî ma raya xo bixebetno. Wa ti kes nêvajo ‘bi raya mi çîyêk nêbeno’. Eke wina bêro vatiş, do xizmetê Erdoganî bêro kerdiş. Cok ra ganî her yewê ma sey Selahattîn Demîrtaşî û namzedanê bînan, hewl bidî herkesî biresnî sindoqan. Wa herkes merdim, dost û dormeyê xo seba raydayîşî îqna bikero.” MERKEZÊ XEBERAN

Peynîye de do îradeya şarî serbikewo

Parlamenterê HDPyî Îdrîs Balukeno ke Zîndanê Tîpa Fyî yê Sîncanî de tewqîfkerde yo, derheqê weçînayîşê 24ê Hezîrane de qisey kerd. Balukenî va ‘senî ke namzedîya mi ameye aşkerekerdiş, hîna ser ra 24 saetî derbaz nêbîbî, cezaya mi ameye tesdîqkerdiş’ û wina domna: “No zî nîşan dano ke qerar qerarêko sîyasî yo. Prosesêko winasî de qerar goreyê konjokturê sîyasî ame girewtiş. Labelê qet şikê mi çin o ke şarê ma do cewabêko manîdar bido. Ma do sey HDPyî çarçewaya pîvananê xo de têkoşînê xo bidomnî. Seba çîyê esasî goreyê waştişê şarê xo hereket kerdiş û çareserkerdişê problemanê şarî yo. Ma do seba awankerdişê Komara Demokratîke hetê şarê xo de bibî û rolê xo kay bikerî. Na çarçewa de ganî şarê ma heme beşdarê weçînayîşanê 24ê Hezîrane bibî û wayîrê sindoqan bivejyî. Lazim o ma vera îttîfaqê AKP û MHPyî de HDPyo ke temînatê demokrasî yo de bêrî têhet. Eke ma wina bikerî do netîceyê tarîxî bivejyî raste. Seba mudaxalekerdişê şîyayîşê tarîxî yew ray bidê HDP û yew ray bidê Demîrtaşî.”