Hewteyêkê verê şewatê daristanan yê ke Dêrsim de vejîyabî ver xeylê reaksîyonî ameybî nîşandayîş. Nê reaksîyonî Avusturya de bîyî kampanya.
Avusturya de Platformê Dormeyî yê Dêrsimî ame awankerdiş û nê platformî seba ke Dêrsim rê 10 hezar leyekan bierşawo, kampanya da destpêkerdiş.
Parlamentera Partîya Keskan ya Avusturya Berîvan Aslane û Verfeka Platformê Dormeyî yê Dêrsimî Umît Sari zî beşdar bîyî û îzehetêk dîya çapemenîye.
Îzehet de sifteyîn Aslane qisey kerde û wina va: “Dêrsim mîrasê kulturî yê elewî û kurdan o. Dêrsim de tena qirkerdişê tebîetî nê, yê kulturî zî yeno kerdiş. Ganî çapemenîya Avusturya vera nêyî de hesas biba. Ez na gama platformî bîyaye vînena û destek dana kampanyaye.”
Texrîbatêko gird beno
Sariyî zî va ‘rojawan û rojhelatê Tirkîya de her serre bi mehneyanê cîya-cîyayan qetlîyamê tebîetî yenî viraştiş’ û wina domna: “Xeylê herêman de seba rantî daristanî yenî veşnayîş û cayê tarîxî yenî çinîkerdiş. Rindîyê tebîî binê barajan de yenî verdayîş. Heskîfo 12 hezar serreyî bi dînamîtan yeno teqnayîş. Netîceyê nê polîtîkayan de tebîet de taxrîbatêko gird virazîyeno. Ma seba ke tayê çîyan bikerî, ameyî têhet û platformê Dormeyî yê Dêrsimî awan kerd. Ma do vera polîtîkayanê çinîkerdişî de bi ronayîşê leyekan kampanya danî destpêkerdiş’.
AWUSTURYA