Tecrîdo girankerde ke Rayberê Şarê Kurd Abdullah Ocalanî ser de yeno meşnayîş, dewam keno. Derheqê Ocalanî ke 18 serrî yo Zîndanê Îmrali de yo ra 1 serrî ra zêde yo ke ti xebere nîna girewtiş. Reyna verê cû medyaya komelkî de tayê xeberî ameybî parekerdiş û nê xeberan ver etirîyayîşê kurdan hîna zêde bîyo. 



Babete ser o dayîkê wanijî û dayîkê aştîye qisey kerdî û vera tecrîdî de reaksîyon nîşan dayî. Dayîkan ra Sevîme dîyar kerde ke dewlete bi serran o ke wazena kurdan çinî bikera û hertim vînî kena û wina va: “Hewl danî heqê kurdan yê rayberê xo ra xebere girewtişî, destê înan ra bigîrî. Dewlete wazena se bikera? Eke çîyêk bêro sereyê Rayberê ma, dewlete do hesabê ci bido. Senî xeta sûre ya heme dewletan esta, xeta sûre ya kurdan zî Rayberê ma yo. Tecrîd sucê merdimîye yo. Ma cinîyî tecrîdî qebul nêkenî, heta şiknayîşê tecrîdî ma do têkoşîn bidî.”


Şar do bêveng nêmano

Dayîka Nesîbe zî tecrîdî qebul nêkena û vera tecrîdî de reaksîyon nîşan dana. Dayîke wina va: “Ma derheqê weşîya Rayberê xo de ti xebere nêgênî. Çi avûkat û çi zî keyeyê ci nêşêno pêvînayîş bikero. Dewlete vana çîyêk bi Ocalanî nêbîyo. O wext çira pêvînayîş nîno kerdiş. Ganî bi hawayo lez pêvînayîşî bêrî kerdiş. Eke çîyêk bibo, şarê kurd bêveng nêmaneno. Tena canêkî ma esto, ma do canê xo feda bikerî.” 


Ma tecrîdî qebul nêkenî

Kombîyayîşê grûba HDPyî ra dima Dayîkê Aştîye seba ke Rayberê Şarê Kurd Abdullah Ocalanî reyde prosesê aştî û muzakereyî dest pêbikerî, Serekwezîrî ra pêvînayîş waşt. Dayîkî waştişê xo ra netîce nêgirewtî. Dayîkan awanîya Meclîsî bi slogananê ‘wa tecrîd biqedîyo’ û ‘cinî, cuye azadî’ hejnayî. 

Babete ser o Dayîkê Aştîye qisey kerdî. Dayîka bi nameyê Cemîle Çîftçîye dîyar kerde ke ganî bi hawayo rew Rayberê Şarê Kurd Abdullah Ocalan keye û avûkatanê xo reyde pêvînayîş bikero û wina dewam kerde: “Cok ra ma ameyî Meclîs. Ganî hemserek û parlamenterê HDPyî ke tewqîfkerde yî, serbest bêrî veradayîş. 

Dayîkan ra Reyhan Akgule zî va ‘Meclîs de tena tirkî nê, ganî heme şarî bêrî pawitiş’ û wina domnaye: “Cayê parlamenteranê HDPyî zîndan nîyo, Meclîs o. Ma tecrîdo ke Rayberê ma ser de yeno meşnayîş, qebul nêkenî. Ma aştî, edalet û pîyacuyayîşî wazenî. Eke edalet bêro no welat, wa herkesî rê bêro. Leşker zî ciwanî zî merdimê nê şarî yî. Ma dayîke yî.”

Dayîke Şemsa Aslane zî arde ziwan ke aye seba ke gonîye nêrijîyo ameya Meclîs û wina va: “Ma seba ke destek bidî parlamenteran ameyî Meclîs. Heqê ma zî estî û ma heqanê xo wazenî.” 


JINNEWS / WAN-ANQARA