Zext û zordarîyê ke hepsîyan ser de yenî meşnayîş, her ke şono zêde benî. Bitaybetî hewl dîyeno hepsîyan ser de cilê tek tîpî yenî ferzkerdiş. Nê zîndanan ra yewe zî Zîndanê Tîpa Lyî yê Antalya yo.
Ame musayîş ke 20 hepsîyê sîyasî ke mîyanê înan de kesêkî LGBTyî zî esto, 124 rojî yo ke hucre de yenî vindarnayîş. Babete ser o Sakîne Jîra ke merdimê aye zîndan de yo û Avûkate Perîhan Ugeye, qisey kerdî.
Jîre va ‘heqê mektube yê hepsîyan yeno astengkerdiş’ û wina dewam kerde: “Hepsîyî seba ke hucreyan bêrî vetiş, 2 rojî kewtî grevê vêşanî, labelê grevê vêşanîye ra netîce nêgirewtî. Selahîyetdarî bi ti hawayî waştişanê şarî rê cewab nêdano.”
Cayo ke kamera nêvînenî de derb kenî
Avûkatanê Komeleya Heqê Merdiman (ÎHD) ra Perîhan Ugeye zî bi raporêkî qala rewşa hepsîyan kerdbî. Uge raporê xo de dîyar kerda ke nîzamo leşkerî hepsîyan ser de yeno ferzkerdiş. Kartê hepsîyan ser de ‘endamê rêxistina terorî’ yeno nuştiş. Wexto ke bi kamerayan sehnenî, bi hawayo nazik nizdî benî, labelê wexto ke kamera çinêbo, o wext hepsîyan derb kenî. Reyna dermanê hepsîyanê nêweşan nînî dayîş. Heto bîn ra heqaretê keso LGBTyî kenî.”
Hepsîyê ke hucre de yenî vindarnayîş nê yî; Sezer Ozkan, Kazim Benek, Abdulkadîr Tatli, Emrullah Çam, Mehmet Aktaş, Halîl Muratoglu, Ozkan Încî, Seyfettîn Gunbey, Lokman Sevîlgen, Bîlal Aksu, Mahsum Ozkan, Îlhan Yukkol, Vahît Şahînoglu, Orhan Onat, Adnan Karataş, Mehmet Yalçin. Selahîyetdarê zîndanî zî derheqê babete de nêwaştî qisey bikerî. Seke yeno zanayîş verê cû zî selahîyetdaran vatbî ewleyîye ver erzîyayî hucre.
MA/DENÎZLÎ