ÎHDyî bi wesîleya 26ê teşrîna verêne Roja Heqanê Nêweşan eşkerayîyêk weşanaye. Goreyê eşkerayîya ÎHDyî hûmara tepişteyanê nêweşanê zindanan 1333 kes ê ke rewşa 457ê ci giran a.
RONÎ ARAM / ANF / ÎSTANBUL
Serra 2019î de mesela tepişteyanê nêweşan dewam kena. Zindanan de hema zî 1333 tepişteyî estî.
Mesela tepişteyanê nêweşan ê zindanan serra 2019î de zî nêameye çarekerdene. ÎHDyî bi wesîleya 26ê teşrîna verêne Roja Heqanê Nêweşan eşkerayîyêk weşanaye. Goreyê eşkerayîya ÎHDyî hûmara tepişteyanê nêweşanê zindanan 1333 kes ê ke rewşa 457ê ci giran a.
Sereka Şaxê Îstanbulî ya ÎHDyî Gulserene Yolerî derheqê rewşa repişteyanê serra 2019î de qisey kerd. Yolerî vat: “Heyf ke meseleyî bi hawayêkê mendeyî nênê çarekerdene. Serranê vîyarteyan de seba ke babete wezaretan û meclîsî reyde ameye parekerdene, zaf çîyî ameyî kerdene. Mîsal tay tepişteyê nêweşî amebî veradayene la no bi xîretêkê pîlî yê seba tepişteyêkî ame kerdene. Labelê na mesela bi sîstemêkê têdûştî yê tepişteyan eşkena bêra çarekerdene.”
Têna doktorêk esto
Yolerî îfade kerd ke Wezaretê Edaletî zanayîşê derheqê tepişteyanê nêweşan ê serra peyêne de eşkera nêkerdî û bi desan tepişteyê nêweşî estê ke ê nameyê înan nêzanenê. Sereka ÎHDyî ya Îstanbulî Yolerî bale ante ser ke revîr zî meselayêka verêne ya weşîye ya zindanan a û zaf revîranê zindanan de têna doktorêk esto. Yolerî da zanayene ke meselaya girane ya diyîne ya tepişteyan zî weşkerdişê bi kelepçeyan û servîsê rîngî yo ke sey hucre yê.
Yolerî ard ziwan ke wextê resnayîşê nêweşxaneyan de tepişteyê nêweşî yê nêweşîyanê astim, zerrî û ê astengdarî ganî bi ambulansî bêrê resnayene û vat: “Labelê nêweşî bi wesayîtanê rîngî benê nêweşxaneyî. Mîsal nêweş heta wextê randewûyî yeno vindertene. Wexto ke karê yewî qedîya heta ke ê bînî pêro muayene bibê o neçare maneno ke vindero.”
Yolerî bi hawayêkê pîtî waşt ke ganî hûmara doktoranê zindanan bêra zêdekerdene, revîrê zindanan û nêweşxaneyan de hîna zêdêr firsendê weşkerdişê tepişteyan bêrê awankerdene.