Tirkîyaya ke heta nika kurdan bi bedilnayîşê nifûsê Vakurê Sûrîye reyde sucdar kerdêne, nika Turkistan, Turkmenistan û Komaranê turkîyan ra keyeyan ana û Cerablus de bica kena. Çend rojî verê no derheq de ma xeberêk dabî û xebere de bedilnayîşê Tirkîya yê nifûsê Vakurê Sûrîye îzeh kerdbî.Ewro zî babete ser o keso ke karê neqlîyekarî keno, qisey kerd.
Keso ke şîrketê ci yê neqlîye esto û nêwazeno nameyê xo bido, va ‘1 serra peyêne de hûmara tirkmenê ke teber ra anî de zêdebîyayîş esta’ û wina domna: “Şîrketê mi zî nê kesan kirişto, ma bi şofêranê xo nê keyeyan kirişenî. Ereb û kurdê ke koçê Cerablusî kerdî zî nêşênî biagêrî Cerablus. Cayê ke ereb û kurdan dima veng benî, herinda înan de tirkmenî yenî bicakerdiş.”
Malê înan talan kenî
Neqlîyekar dewamê qiseykerdişê xo de vano ‘her keyeyo ke Cerablus de yeno bicakerdiş rê, keyeyê ke aydê ereb û kurdan î, hêga û kar yenî dayîş’ û wina dewam kerd: “Heto bîn ra maaşêko mabênê 300 û 400 dolarî de dîyeno keyeyan. Heta nika mi bi xo zî 150 keyeyî kiriştî Cerablus. Tayê keyeyî Dîlok, Hatay, Mêrsîn, Osmanîye û sewbîna bajaran ra ameyî. Tirkmenê ke Osmanîye ra ameyî, verê cû kampa bextwaştoxan de mendênê.”
Îdareyê koçî ca gêno
Neqlîyekarî va ‘tayê tirkmenî Merkezê Tepîyaerşawitişî ra yenî’ û wina domna: “Ma sînorê Karkamişî de keyeyêkê reyde pê kerd. Wexto ke ma ameyî berê sînorî, endamê keyeyî nasnameyêk nîşanê wezîfedaran da, wexto ke wezîfedaran ê nasnameyî dîyî, qet ma nêvindarnayî û ma girewtî zere. Mi rayîr de ê kesî ra derheqê nasnameyî de persan pers kerd. Ê kesî mi ra va ‘wezîfedaranê dewlete nê nasnameyî dayî ma. Ez Turkistano Rojhelat ra ameya Tirkîya û demêko derg bî ke ez Merkezê Tepîyaerşawitişî de mendêne. Wezîfedaran seba ke ma derbazê Sûrîye bibî pere û nasname dayî ma’. Badê ke ma şîyî Cerablus, keso bi nameyê Saît, ame vernîya ma. Mi keyeyî teslîmê ci kerd û ez tepîya agêraya.”
Neqlîyekarî peynîya zî aşkere kerd ke demê peyênan de berê sînorî tirkmenan reyde pirr o.
E. ALAYÛMAT/H.YUSUF TOPALOGLU / DÎHABER/DÎLOK