15ê Tebaxa serra 1984î de ro ser esasanê felsefe û paradîgmaya Rayver Ocalanî û di bin fermandarîya Mahsûn Korkmazî (Egîd) de, hetê çend ciwanan ra Dihê û Şemzînan de çend fişekî teqayî. O wext ne Şarê Kurdî, ne dewleta Tirke û ne zî hêzanê herême, bawer nêkerdê ke do na felsefe û paradîgmaya ke nêy fişekî dayî teqnayîş, bireso ewro. Reyna tu hêz û sîyasetêk texmîn nêkerdê ke do nêy fişekî bibê binkeya vurîyayîşanê sîyaset, polîtîka û hemsengîyanê Rochelatê Mîyanênî û hêzê hegemonîkan yê cîhanî di Rochelato Mîyanên de.
Seba ke a roce ra ver zî Şarê Kurdî bi doran verva îşgalkeranê Kurdistanî, serre wedartbi û lehengîyê bêsaloxîy nîşan dabî. La nê serrewedartişî amebî pelexnayîş, serkêş û serokêy serrewedartişan amebî dardekerdiş û persgira zî amebî çareserkerdiş. Berzencî ra heta Şêx Seîdî, Sey Rizayî ra heta Qazî Mihemmedî, rewşe tim bi ney awayî xo digarg kerdbi. Dewleta Tirke badê qetlîyamê Gelîya Zîlanî Koyê Araratî de na rewşe wina ardbî ziwan. " Kudistano ke ameyêne xeyalkerdiş, tîya de mewta yo"
Dewleta Tirke, hêzanê herême û heta hêzanê cîhanî, reyna bi ney feraset û cerebnayîşê ke tarîx de pêk ameyê, ewnîyayêne nêy çalakîyan ra. La wina nêvecîya û heme hesabî serobin bîy. Dewleta Tirke, bi paştîdayîşê hêzanê herême û heme hetkarîyanê NATO, nêşika ney feraset û hereketê neweyî, têk bero.
Badê 14 serran hetê Dewleta Tirke û hêzanê hegemonîkan ra ame dîyiş ke na rewşa newîye, nêşibêyena cerbnayîşanê tarîxîyan. NATO bi xo kewte dewre û dest bi plansazîya komploye kerd. Serra 15. ya 15'ê Sibata 1999î de Rayverê Şarê Kurdî û awankarê paradîgmaya newîye Rayver Apo, hetê hêzanê NATO ra ame dîlgirewtiş û teslîmê Dewleta Tirke ame kerdiş.
Bi na komplo ameyê hesabkerdiş ke do bi teslîmgirotişê serokê hereketî, tarîx reyna xo digarg bikero. Serrewedartişê şarê kurdî do na dore bêke reyna birih bibo, reyna bêro binaxkerdiş. Hêzê komplogeran no nîyetê xo zî "Do hereket 6 mengan de biqedîyo" ardbi ziwan.
Rih û felsefeya 15'ê Tebaxe, bi êrîşanê Dewleta Tirke û heme hetkarî û komployanê hêzê cîhanîyan, 34 serrî xo ra pey verda û keweno serra 35. Di peynîya nêy 35 serran de Hereketê Apoyî, hem Rochelato Mîyanên hem zî dinya de, bi felsefe û paradîgmaya xo bîyo omidê demokrasî, aştî û azadîya şaranê bindestan.
Ewro ke ma serrgêra 34. û kewtişê serra 35. yê 15'ê Tebaxe, mîladê newe ra gîyanbîyîşê Şarê Kurdî pîroz kenê de, rihê 15'ê Tebaxe hemeyê Rochelatê Mîyanênî giroto ra xo ver. Di na ravêreyî de bedêlê zaf giranî ameyî dayene û nika zî dayîşê berdêlan, dewam keno.
Hereketê Azadîya Şarê Kurdî, di Rochalato Mîyanên de bi Paradîgmaya Modernîteya Demokratîke, bîyo alternatîfê Modernîteya Kapîtalîste û xeylê hesabî serobin kerdê. Di herême de êdî bêke Hereketê Azadîya Kurdan ver çiman de bêro girotişî, dîzaynêko newe bi ser nêkeweno. Na rewşe bi qasê erênî û destkewteyan, talûkeyan zî mîyanê xo de hewênena. Hereketê Azadîya Şarê Kurdî çendêke pîl û bitesîr beno, hendêke zî hesab, plan û komployê verva hereketî, zêdîyenê. Coka rayîrê Şarê Kurdî derge û durî ya. Gere serranê ravêrteyan zêdîrî, xoverdêrî û têkoşîn bêrê xurtkerdiş.
Seba naye têkoşînê verva dişmenî reyde gere, rojdema yewine ya Şarê Kurdî şikitişê tecrîdê Îmrali û azadîya Rayver Apoyî bo. Her kurdêke gere bi no feraset û na hişmendîye, têbigeyro. Bi hêvîya bi Rayver Abdullah Ocalanî reyde, pîrozkerdişê serrgêra 35.