Her tim vanê ‘ma hezar serra jê birayan têhet de weşiya xo xo rameme.’
No zur, zurê hezar serran o.
Çike na birayenî qeyta nêbiye. Tirk ke amê nêamê, Anadoluye de gonî sona.
Jede peyser nêşîme. Ala reye niyadîme, 1900 ra hata ewro se biyo. Kamij birayenî Anadoluye de ama ciwiyayene.
Herbê dîna yê 2îne ra dime, kurdî Qoçgirî de ameyî qirkerdena. Dima, honake gonya qoçgirîyizan husk nêbiya, mesela Şex Seîd dest kerd ci. Onca kurdî ameyî qirkerdene. Hona gonya înan husk nêbiye, Derê Zîlan de kurdî ameyî tertele kerdene.
Birayenî na wa, heya?
Qomê kurdî şîwara Derê Zîlanî vatenê, astê kurdan hona tîjî verde bî, na raye ‘birayê’ ma kewt Dersîm. Derê Laçê bi cendegan kerd pirr, derguşî pîzê mayan de bi sungiyê kerazinî ameyî qetil kerdene. Sarê rayveranê ma, cengdaranê ma cira kerdî. 70 hezar dersîmizî ameyî qirkerdene.
Birayenî na wa heya?
Dima kurdistanizî surginê yemê Tirkiye kerdî, domonê ma, mara guretî berdî xorê kerdî xizmetkar, dayî zeweznayene, welat ra visnayî. No zî jû tertele bî.
Birayenî na wa, heya?
Zonê ma kerd qedexe, rengê ma kerdî qedexe, jiyar û diyarê ma bomba kerdî.
Mara vat ‘zonê sima, zonê medeniyetî niyo’ ma bi zor û zorvajiye asîmîle kerdîme. Kulturê ma, marê jê cinawir da misnayene, ma cira fîştme durî.
Birayenî na wa, heya?
Serranê 1970 ra na het 50 hezar ra jede kurdistanizî ameyî qirkerdene, 4 hezar ra jede dewê ma ameyî vêsnayene, bi milyonan însanê ma, warê û dewanê cira kerdî tever. Zerrê bonande însanî, axuran de mal û gayî wesawes ameyî vêsnayene. Domonê kurdî erjînê hepis, cirê tecawiz beno, dewlete cirmkaran rê tewa nêkena. Gerîllayan kisenê, gosanê ci cirakenê, jê halete mordemanê xorê rusnenê.
Birayenî na wa, heya?
Roboskî de 34 domonanê kurdî kenê pirtley, lêborîne nêwazenê, peranê gonî danê. Bêdlîs de 15 ceniyanê kurdî kisenê, vanê ‘ma terorîstî kistê.’
Birayenî na wa, heya?
19ê hezîrane yemê Orêmar de herb de eskerî merdî, onca birayenî ra qesey kenê, vanê ‘ma hezar serra jê birayan têlewe de weşiya xo rameme, taye naye nêwazenê.’ Eskerê xo ke merdî, birayenî nêbena, gerîllayî ke merdi, birayenî bena, gorê nînan.
Nahletî şero na birayenya gonine!
Tirk, ya zî kurd, kam ke vano, ma hezar serra jê birayan piya weşiya xo rameme, o hezar serrî yo zurkeno û gonî verdano de.