Tayê meslegê ke bi seyan serran o estî, bi averşîyayîşê teknolojî û makîneyan ver bi çinîbîyayîşî de şonî. Nînan ra yewe zî lihêfderzî ya. Bi nameyê Westa Kerîm Hesenî de keso ke Kerkûk de cuyeno, 20 serrî yo ke karê lihêfderzîye keno. Hesen bi kêfweşî karê xo domneno, labelê çinbîyayîşê meslegî ra gerrekar o.
Westa Hesen hîna domanîya xo de pîyê xo ra nê meslegî musayo û 20 serrî yo ke bêmabên nê karî keno. Dikanê ci mîyanê sûka Serçinarî ya Kerkûkî de yo. Hesen serê sibayî saete 8.00 de dikanê xo akeno û dest bi viraştişê doşeg, balişna û nivînan keno. Westa seba viraştişê doşegî peşmê pezî bikar ano û makîneya ci ya peşmî zî esta.
Westa dîyar keno ke verê cû hende haletê averşîyayeyî çinêbî û wina domna: “Cok ra ma roje de tewr zaf 3 doşegî amade kerdênê. Nika teknîk aver şîyo û ma saetêk de heme karê xo temam kenî. Verê cû ma hîna zaf kar kerdêne, labelê nika êdî betanîyî yenî viraştene, cok ra nivînî kêm virazîyenî.”
Westa Kerîm Hesen goreyê waştişî seba her doşegî mabênê 5 û 6 kîloyî de peşm bikar ano. Westa bade ke peşmî pak kerd û da makîne ro, erzeno mîyanê qumaşî û derzeno.
ROJNEWS / KERKÛK