Kurdistan de netîceyê hêrişê dewlete yê xoverdayîşê xorayîrberdişan de 220 YPSyî şehîd kewtbîy û her çiqas ke çend aşmî yo ke cenazeyî destê dewlete de yî hema zî cenazeyî nêameyî teşhîskerdiş û goristanê bêkesan de yenî vindarnayîş.
Şarê kurdî vera polîtîkayê dewlete yê bêçareserîye de Sûr, Cizîr, Hezex, Şirnex, Gever, Nisêbîn û sewbîna cayan de xoserîye îlan kerdîbî. Hêzê dewlete zî vera nê xoverdayîşî de bi tanq û topan hêrişê xoverdakaran kerdbî. Netîceyê şero ke bi aşman dewam kerd de heta nika cenazeyê 220 ciwanan semedo ke nasnameyê înan nêame tesbîtkerdiş, goristananê bêkesan de yeno vindarnayîş.
223 rojî ke nêameyê tespîtkerdiş
Qezaya Sûrî ya Amedî de 28 Teşrîna Peyên ya 2015 de qedexe amebî îlankerdiş û 8ê adare de zî amebî vatiş ke ‘operasyon qedyayo’. Nê vatişî ser o 223 rojî vîyartî labelê 13 cenazeyê ke wextê xoverdayîşî de merdbî, hema zî tesbîtê nê 13 cenazeyan nêameyo kerdiş. 57 cenazeyî zî her çiqas keyeyê înan finakê gonîye daybî zî bi aşman ra dima ameybî teşhîskerdiş.
Şirnex de 14ê adare de qedexeyê tebervejîyayîşî amebî îlankerdiş û dima zî hêrişî dest pêkerdbî. Netîceyê şerî de 53 YPSyîyan ra 23 cenazeyî heta nika ameyî teşhîskerdiş.Cenazeyê ke ameyî teşhîskerdiş, ameyî definkerdiş. Zaf cenazeyî hewayo korsan dormeyê bajarî de ameyî definkerdiş û zaf cenazeyî zî Silopî de goristanê bêkesan de ameyî definkerdiş. Nisêbîn de zî hetê Koordînasyonê YPSyî ra ame aşkerekerdiş ke 51 endamê YPSyî merdî û heta nika 80î zêde cenazeyî taxan ra ameyî vetiş. Cenazeyê ke taxan ra ameyî vetîş heme zî goristanê bêkesan de yenî vindarnayîş.
51 cenazeyî Erzirom de yî
Gever de 14 adare de qedexe ame îlankerdiş û dima ra zî hêrişî dest pêkerdbî. Netîceyê şerî de 51 cenazeyê ke taxan ra ameyî vetiş, Erzirom de goristanê bêkesan de yenî vindarnayîş. Keyeyê ke seba girewtişê cenazeyanê xo muracat kerdî, hîna ti netîce nêgirewtî. Her çiqas ke nameyî ameye aşkerekerdiş zî cenazeyî teslîmê keyeyan nînî kerdiş.
Cizîr de zî hêrişê qirkerdişî 14ê kanûne de dest pêkerdbî û 79 rojî domîyayî. Netîceyê hêrişan de 46 cenazeyê ke cêrzemînan de bi ganî ganî ameyî veşnayîş, hema zî nêameyî teşhîskerdiş. Yeno zanayîş ke 278 cenazeyî zî bi muracatê keyeyan ra dima ameybî teşhîskerdiş. Badê nameyê kesan hetê YPSyî ra ame aşkerekerdiş, keyeyî reyna muracat kerdî la ti netîce nêgirewtî.
220 keyeyî cenazeyanê xo pawenî
220 cenazeyî ke wextê xoverdayîşan de merdbî, her çiqas ke çend aşmî ser ra vîyartî zî nêameyî teşhîskerdiş. Cenazeyî Xarpêt, Amed, Dîlok, Riha, Meletî, Mêrdîn, Erzirom, Qoser, Silopî û Şirnex de goristananê bêkesan de ameyî definkerdiş. Keyeyî paweyê teşhîsbîyayîşê cenazeyanê xo yî.
DÎHA / AMED