ELÎF SONZAMANCI PÎRHA /KOLN Weçînayîşê 24ê Hezîrane rê 6 rojî mendî û Ewropa de zî raydayîş do siba biqedîyo. Na çarçewa de Kurdistan û Tirkîya de lez dîyayo xebatanê weçînayîşî, Ewropa de raydayîş ver bi peynîye şono. Hetê cîya-cîyayî seba raydayîşî veng danî. Babete ser o sîyasetmedar, rojnameger û temsîlkarê rêxistinê sîvîlî yê Almanya, qisey kerdî. Serekê Cemîyeta Armenîyê Kolnî Mîno Nîkpaye va ‘polîtîkaya zere û teberî ya Almanya dirî ya’ û wina domnaye: “Herkes goreyê menfîetê xo hereket keno. Şertê ewroyî eynî nîyî, ganî ma 12ê Êlule xo vîra nêkerî. Tena hewldayîşê rêxistinanê sîvîlan bes nîyo, ganî dewletê girdî zî destek bidî.” Rojnameger Osman Akkanî ‘ewro herkes zano ke no weçînayîş seba Tirkîya weçînayîşê qederî yo’ û wina dewam kerd: “Herkes zano ke her raye muhîm a. Ewropa Ewropa de seba raydayîşî rêzê dergî virazîyenî. Bitaybetî muxalîfî nêşênbî vengê xo berz bikerî zî, zaf muhîmî danî beşdarbîyayîşê weçînayîşî. No seba demokrasî qezencêko gird o. ” Ma do destek bidî HDP Parlamentera Partîya Keskan ya Eyaletê NRWyî Berîvan Aymaze zî wina va: “Ma zanî şert û şurtê weçînayîşê Tirkîya bi hawayêko demokratîke nêbenî. Ewro namzedê serekkomarîye zîndan de yo. Vera HDPyî de zextî girdî estî û sindoqan de kayî kay benî. Labelê reyna zî merdimî bihêvî yî. Ma Partîya Keskan do bi hawayo fermî destek bidî HDP.”