24ê Temmuze Roşanê Çapemenîye û Rojnamegerîye yo û her serre hetê rojnamegeran ra yeno vîrardene. Babete ser o Platformê Rojnamegeranê Cinîyanê Mezopotamya îzehetêk da çapemenîye. Îzehet de bale ancîya tewqîfbîyayeyîya 10 hezar rojnamegeran ser û ame vatene ke Tirkîya ewro serranê 1908î ra tepîya ya. Platformî da zanayene ke wextê Osmanîyan de rojnameyî karmendanê sansurî ra derbaz bîyêne û dima ra weşanîyayêne û wina dewam kerd: “24ê Temmuza 1908î de Meşrûtîyeto 2. ame îlankerdene û no qaîde wedarîya. No hedîse Tirkîya de sey wedarîyayîşê sansurî ame namekerdene û Roşanê Çapemenîye ame îlankerdene. Labelê ewro dûşto tewr berz de sansur esto. Sansuro ke çapemenîye û rojnamegerîye ser o esto, derheqê azadîya îdareyê welatêkê de melumat dano merdimi.” Platformî dewamê îzehetê xo de vato ‘rojnamegerî bi tehdîdanê tewqîfbîyayîşî têrî yî û derheqê înan de bi desan serran cezaya zîndanî yena waştene’ û wina domna: “Ewro Tirkîya de 10 hezar rojnamegerî bêkar î. Reyna hendêna zî bêtemînat û bêsendîka xebetîyenî. Wexto ke merdim na çarçewa ra ewnîyeno, Tirkîyaya ewroyêne Tirkîyaya 1908î ra tepîyayêr a. Ma rojnamegerê cinîyî 24ê Temmuze sey roja têkoşînî vînenî. Ma bawer kenî ke rojê weşî nêzik î û ma veng danî heme rojnamegeranê cinîyan ke wa têkoşîn gird bikerî.”
JINNEWS / AMED