AYDIN ATAY / MA / AMED
Kesê ke wextê qedexeyê tebervejîyayîşî de qezaya Sûrî ya Amedî ra amebî tehlîyekerdene, mehkemeya 19ê ci domanî 40 kesan Gulana 2017î ra nata dewam kena. Dosyaya nê kesan de xeylê sucî ameyî nuştene û nizdîyê 3 serrî yo ke doze dewam kena.
Nê kesan ra yewe zî Helîn Yapici ya. Yapici 19ê Adara 2016î de ameye tepiştene û dima ra tewqîf bîye. Yapici wexto ke mehkemeya xo ya ewile de pawitişê xoserîye kerdêne, hetê cendirmeyan ra ameye vetene bi teber. Mehkema ra dima Yapici zî sey embazanê bînan surgun bîye û erşawîyaye Zîndanê Xarpêtî. Mehkemeya ewile ra nata 10 roniştişî bîyî, labelê Yapici nêşêna beşdarê mehkeme bibo. Yapici nika Zîndanê Osmanîye de manena.
Avûkata Yapici Cemîle Turhalli Balsake va ‘ronitişo yewin ra nata heqê mehkemebîyayîşî ameyo îxlalkerdene’ û wina domnaye: “Mehkemeya yewine ra yo ke hertim mudaxaleyê pawitişê muwekkîla mi yeno kerdene. Tena muwekkîle nê, avûkatî zî raştê mudaxaleyan yenî. Muwekkîla mi surgun ra dima bi rayîrê SEGBÎSî zî beşdar nêbî. 3 serrî ra zêde yo ke muwekkîla mi yena mehkemekerdene, labelê hîna çîyêk safî nêbîyo. Mehkemekerdiş bîyo cezakerdiş, her mehkeme de waştişê ma yeno redkerdene.”