Qezaya Gundikê Melê ya Şirnexî de 2 rojî verê ocaxê madenî de netîceyê teqayîşê grîzuye de 3 karkerî mehsûr mendbî. Dima ra netîceyê xebatê gêrayîşî de ame dîyayîş ke her 3 karkerî zî merdî.
Cenazeyê karkeran ra Abdurrahman Tunç, Omer Tunç û Îdrîs Înalî 60 metre binê erdî de mendbî, hetê ekîbê AFADî ra ameyî vetiş. Cenazeyê ke ameyî vetiş sewqê morgê Nêweşxaneyê Dewlete yê Şirnexî bîyî. Badê ke karê otopsiye qedîyaye, cenazeyi dewa Gundikê Melê de ameyî definkerdiş.
Ame musayîş ke Omer Tunç û Abdurrahman Tunç birayê yewbînan î û eynî keyeyî ra yewna birayê înan serra 2009î de ocaxê madenî de netîceyê hezazî de merdo. Babete ser o dayîka karkeran dîyar kena ke par reyna maden de esteyê piştîya Abdurrahmanî şikîyabî, labelê hîna tam weş nêbîbî, dest bi karî kerd.
Nê cinayetan ra dewlete berpirsîyar a
Parlamentera HDPyî ya Şirnexî Leyla Bîrlîke zî va ‘seba ke kontrolî çin î, mergî benî’ û wina dewam kerde: “Bajar de netîceyê pêrodayîşan de bîlanço xora giran bîye, nika zî na bîlanço bi cînayetê karî dewam kena. Merdimê ma seba ke debara xo bikerî, mergî gênî xo çim. Hende vînîbîyayeyê giranî benî, çira ekîbê mudaxaleyê lezî çin î. No zî nîşan dano ke çiqas erj danî cuya merdiman. Heme dezgehê dewlete nê cînayetî ra berpirsîyar î. Nê cînayetî polîtîkayanê dewlete ra qerfîyaye nîyî.”
NAVENDÊ XEBERAN