Şaredarîyanê Hezro û Yenîşehîrî yê Amedî, Şaredarîya Hezexî ya Şirnexî û Şaredarîya Pêrî ya Mazgêrdî ya Dêrsimî bi fermanê Wezaretê Karanê Zereyî ameyî xespkerdene.
Hemşaredarê Şaredarîyanê Hezro û Yenîşehîrî, Şaredarîya Hezexî ya Şirnexî û Şaredarîya Perî ya Mazgêrdî ya Dêrsimî bi fermanê Wezaretê Karanê Zereyî wezîfe ra ameyî girewtene û herinda înan de qeyûmî ameyî cakerdene. Heta nika 16 şaredarîyê HDPyî ameybî xespkerdene.
Şaredarîya Perî ya Dêrsimî ameye xespkerdene. Cendirmeyî nêverdanê hemserekê Şaredarîya Pêrî Songule Dogan û Orhan Çelebî dekewê zereyê bîna û dormeyê bînaya şaredarîye hetê cendirmeyan ra ameyo girewtene.
Polîsî serê sibayî rew şîyî keyeyê Hemsereka Şaredarîya Hezexî Songule Erden ke teblîgatî bidê îmzakerdene. Songule Erden teblîgat îmza nêkerd. Ame vatene ke Erdene bi îdîayanê “endamîya rêxistîne” û “propagandaya rêxistine” wezîfeyê ci ra ameye dûrvistene.
Hemsereka Şaredarîya Yenîşehîrî Belgîne Dîken zî bi îdîaya “endamîya rêxistine” wezîfeyê ci ra ameye dûrvistene û herinda aye de qaymeqamê qezaye Murat Beşîkçî sey qeyûmî ame bicakerdene.
Hemserekê Şaredarîya Hezroyî Ahmet Çevîk zî bi îdîaya “endamîya rêxistine” wezîfe ra girîya û şaredarîye ameye xespkerdene. Dormeyê bînayanê şaredarîyanê ke ameyî xespkerdene, hetê polîsan ra ame girewtene. Bînayanê şaredarîyan de cigêrayîş yeno kerdene û polîsî nêverdenê endamê meclîsî debikewê zereyî.
ANF/AMED