20ê Temmuza 2015î de Pirsus de netîceyê hêrişêko bomeyin de 33 ciwanê SGDFyî ameybî qetil kerdene û ewro serrgêra 3. ya qetlîyamî yo. Herçiqas ke hîrê serrî derbaz bîyî zî heta nika qatilî nêameyî dîyayene, labelê merdimê şehîdanê Pirsusî ameyî tepiştene û tewqîf kerdene û mezelê şehîdan raştê hêrişî ameyî. 3 serrî verê 20ê Temmuza 2015î de qezaya Pirsusî ya Riha de hêrişêko bombeyîn amebî kerdene û netîceyê hêrişî de 33 endamê Federasyonê Komeleyê Ciwananê Sosyalîstan (SGDF) ameybî qetil kerdene û 100 ra zêdeyêr kesî zî birîndar bîyî. Emser serrgêra 3. ya Qetlîyamê Pirsusî yo. Keyeyê kesê ke ameyî qetil kerdene, fek gêrayîşê edaletî ra veranêdayî. Vera keyeyan de zext û tedayî zêdîyayî û avûkatê doze zî tede xeylê kesî ameyî tewqîf kerdene. Hêrişî ra 2 rojî ra dima qezaya Serê Kanî de 2 polîsî ameyî kişîyayene û îqtîdarî nêyî nîşan da û herême de operasyon da dest pêkerdene. Pêvînayîşê Rayberê Şarê Kurdî Abdullah Ocalanî reyde bîyêne, ameyî vindarnayene û şer dîya dest pêkerdene. Erdogan herinda ke qatilan bivejo orte, seba ke ser qetlîyamî bigîro, çi destê ci ra ame kerd. Herinda ke çeteyanê DAIŞî bêrî tewqîf kerdene, endamê HDP û SGDFyî ameyî tepiştene. Îdîaname 18 aşmî ra dima ame amade kerdene û doze zî 21 aşmî ra dima dest pêkerde. Xelate dîyaye mudurê asayîşî Badê ke ame fam kerdene ke xebera yewîyanê emnîyetî hedîse ra esta, Mudurê Asayîşî yê qeza Mehmet Yapalial rê sey xelate ceza ameye dayene. Tena cezaya 7 hezar 500 TL dîya ci. Dima ra tehqîqatê mufettîşî ame kerdene û tena 2 polîsî ameyî sucdar kerdene. Polîsan ra Alî Koçakî mehkeme de dîyar kerd ke înan derheqê qatil Abdurrahman Alagozî de xebere daya emnîyetî, labelê ti tedbîr nêameyo girewtene. Mîyanê 3 serran de 3 dozgerî û heyetê mehkeme ameyî bedilnayene. Qatil û berpirsîyarî nêameyî tepiştene, labelê yê ke bi hawayo birîndar xelisîyayî, avûkat û şahidôhertim raştê tepiştiş û tewqîfbîyayîşî ameyî.” Hêrişê mezelan daxî kerdî Seba ke keyeyê kesê ke ameyî qetil kerdene bitersnî, hêrişê mezelan kerdî. Bitaybetî mezelê kesê ke herême de ameybî defin kerdene, çend reyî raştê hêrişî ameyî. Dayîka Polen Unluya ke qetlîyam de merde, Şennur Ayaz Unlu hîna edalet nêdîbîye, wefat kerde. Heto bîn ra keyeyî her 20ê aşme de bi siloganê ‘seba Pirsusî edalet, seba herkesî edalet’ Kadikoy de çalakîye virazenî. Wazenî serê hedîseyî padî Kongreya Komelê Demokratîke (KCD) bi wesîleya serrgêra 3. ya qetlîyamî de îzehetêko nuştekî daye. KCDyî îzehetê xo de vato ‘ciwanê SGDFyî raştê qetlîyamêko gird ameyî’ û wina dewam kerdo: “Netîceyê hêrişî de 33 ciwanî şehîd kewtî û bi seyan ciwanî zî birîndar bîyî. Herçiqas ke 3 serrî derbaz bîyî zî hîna qatilî nêameyî dîyayene. Ma serrgêra 3. de şehîdanê Pirsusî bi ruhê têkoşînî û qerardarîye vîr anî û ma do xeyalanê înan têkoşînê xo de bidî domnayene. Ma soz danî ke ma do xeyalanê înan pê bîyarî. Ma zanî ke ancax ma xo hîna zaf rêxistine bikerî, eşkenî wayîrê vîrardişanê înan bivejyî. Ma şexsê şehîdê Pirsus û Rojawanî de heme şehîdan biminet vîr anî.” MERKEZÊ XEBERAN