Wezîrîya Karanê Zereyî yê Tirkîya şaredarîyanê Partîya Demokratîke ya Şaran (HDP) yê Peyas, Bismil û Karazî yê Amedî û Erdîşê Wanî rê qayûm tayîn kerd.
Şaredarîya Peyasî serê sibayî hetê polîsan ra girîya binê ablûqa û dîya zanayene ke qayûm ameyo bicakerdene. Polîsan endamê Meclîsê Şaredarîye bi derbkerdiş şaredarîye ra vetî û banê şaredarîye bi barîyeran ame girewtene. Reyna şaredarîyê Bismil û Karazî zî girîyayî binê ablûqa banê înan de cigêrayîşî ameyî kerdene.
Xora 2 rojî verê Hemserekê Şaredarîya Bajarê Girdî ya Amedî Selçûk Mizrakli yo ke herinda ci de qayûm amebi tayînkerdene, Hemsereka Şaredarîya Peyasî Kezîban Yilmaze, Hemserekê Şaredarîya Bismilî Orhan Ayaz û Gulcan Ozere, Hemsereka Şaredarîya Karazî Rojda Nazliere ameybî tepiştene. Wan de zî 15ê Teşrîna Verêne de hemşaredarê Erdîşî Yildiz Çetîne û Bayram Çîçek ameybî tepiştene. Hema îfadeyê înan zî nêameyo girewtene, herinda înan de qayûm ame tayînkerdene.
AMED