Almanya her çiqas ke nameyê muxabîrê Dîe Weltî Denîz Yucelî bîyaro ziwan zî vejîya orte ke hûmara hepsîyê zindanan xeylê zêde yî û pêro pîya 44 hemwelatîyê Almanya zîndananê Tirkîya de yî. Badê bazarîyê rejîmê AKP û hukmatê Almanya, heqê pêvînayîşî yê konsolosan zî yeno astengkerdiş.Badê ke Partîya Keskan pêşnîyaznameyê persan berde meclîs û Angela Merkele zî cewab daye pêşnîyaznameyî, raştî ame zanayîş.
Angela Merkele da zanayîş ke 44 hemwelatîyê înan Tirkîya de zîndanan de yî û heqê înan yê pêvînayîşê konsolosan zî hetê Tirkîya ra yeno astengkerdiş.Badê netîceyê israrê hukmatê Almanya, dewleta tirk heqê pêvînayîşê konsolosî yê açarnayoxa Ajansê Xeberan Etkînî Meşale Toluye qebul kerda. Her çiqas ke Toluya ke 30ê nîsane ra nata Tirkîya de tewqîfkerde ya û hemwelatîbîyayîşê Tirkîya ra vejîyaya zî no heq hetê hukmatê AKPyî ra ameyêne astengkerdiş.Verfekê Wezîrîyê Teberî yê Almanya 2 rojî verê îzah kerdbî ke do konsolos roja îne şêro pêvînayîşê Toluye. Goreyê îdîaya hukmatê Almanya, Tirkîya vîşêrê Toluye heqê pêvînayîşî nêdana ti kesî. Heto bîn ra Almanya îzeh kerde ke 44 hepsîyan ra 13ê ci emserr ameyî tewqîfkerdiş û yê bîn zî mabênê serranê 2006 û 2016 ameyî tewqîfkerdiş. Derheqê tewqîfkerdişan de çîyêk nêame vatiş.
ANF/BERLÎN