DELÎL FIRAT

ANHA /HALEP

Bi nameyê Ebû Mihemedî de kesêk, roja destpêkê şerê Rojawanê Kurdîstanî ra nata meterîsê xo de yo û o wext ra nata meterîsê xo canêverdayo. Ebû Mihemed herçiqas ke şer mîyanê bajarî de vilayê cayanê cîya-cîyayan beno, o bi hawayo nîzamî heta saetê ereyî nuqtaya kontrolî de nobete tepişeno.

Rojawanê Kurdîstanî de vera hêzanê dagîrkeran de têkoşînê xoverdakaran domîyeno. Vera hêzê ke wazenî dagîrkerîya xo mende bikerî de kurdî newe ra tarîxê xo nusenî û şaranê bînan rê zî benî îlham.

Kurdî hetêk ra erjê xo yê neteweyî û demokratîkan pawenî, heto bîn de zî çarçewaya neteweya demokratîke de ameyoxêk awan kenî. Netîceyê nê projeyî de Vakurê Sûrîye de kurd, ereb, suryanî, asurî, çerkes û şarê bînî pêro pîya têkoşîn danî. Nimuneya tewr baş ya nêyî Heleb û Ebû Mihemed o.

Ebû Mihemedo ereb ke pîyê 5 domanan o, eslê xo de efrînij o û nika Heleb de cuyeno. Ebû Mihemed wexto ke qisey keno, bi no hawa qala prosesê xoverdayîşî keno: “Sîlehê ma çinêbî, ma çend merdiman reyde nobete tepişte û taxa xo pawit. Dima ra YPG ame û sîleh da ma.” Ebû Mihemed destpêkê şerê Rojawanê Kurdîstanî ra nata bajar de maneno û meterîsê xo nêterikneno. No merdimo kedkar bi cilê xo yê leşkerî, nuqtaya kontrolî de nobete tepişeno.

‘Ma 3 kesan nuqtaya kontrolî awan kerde’

Wexto ke şer dest pêkeno, Ebû Mihemed bi 3 embazanê xo taxa Şêxmeqsûdî de nuqtaya kontrolî awan kenî û dest bi pawitişê taxe kenî. Ebû Mihemed wina qala têkoşînê xo keno: “Wexto ke 2013 de çeteyanê OSO hêrişê Helebî kerdî, ma 2-3 kesan nuqtaya kontrolî awan kerde. Dima ra ciwanî ameyî. Labelê destê ma de sîlehî çin î. Ma dormeyê keye û peyerayîrî ser o rakewtêne. Ma ewil bi haletanê erjanan reyde pawitişê xo kerdêne. Dima ra YPG ame û sîleh da ma. Ez dima ra beşdarê YPGyî bîya. Verê şar zaf bi, labelê badê ke hêrişî zêde bî, qismekê şarî koç kerd.”

Tamîrkar bi, nika karê pawitişî keno

Ebû Mihemed heta 2013î tamîrkarîya makîneyanê deştişî kerdêne û dormeyê xo de zaf ameyêne hes kerdêne. Herçiqas ke Heleb de keyeyê ci çin o zî, ewja de beşdarê xoverdayîşê xopawitişî beno. Lajêkê ci şerê xopawitişî de ca gêno û lajê ci yo bîn zî Şehba de Xoverdayîşê Seserre de ca gêno. Seba ke nuqtaya kontrolî cayêko stratejîk de ya, Ebû Mihemed hetê herkesî ra yeno nas kerdene.”

Ma do dişmenan ra pak bikerî

Mihemed vano ‘çeteyî û hêzê ke destek danî çeteyan do binkewî’ û wina qedêneno: “Şarê ke dormeyê Neteweya Demokratîke de ameyî têhet do serbikewî. Ez paweyê agêrayîşê Efrînî ya û eke vera Efrînî de hemle dest pêbikera, ez zî do beşdarê hemle biba. Hêzê ke çeteyî ardî û Efrîn xira kenî, do binkewî. Ma wayîrê Efrînî do Efrîn dişmenan ra pak bikerî.”