Goreyê zonayîşan saziyê tiba edlî de 39 cenaze yê aîdê HPG’yijan ke operasyonê 2 aşmanê peynî de weşîya xo kerdî vinî, paweyê netîceyanê testê DNA yê. 26 cenaze zî mezelanê bêkesan de amey definkerdiş.
2 aşmanê peynî de herêmanê zey Bedlîs, Çewlîg, Amed û Mêrdîn de “Qedexeyê vejyayîşê teber" ame îlankerden. Îlankerdenê qedexeyan ra dima zî operasyonê lejkerî amey destpa kerdiş. Cenazeyê HPG’yijan ke nê operasyonan de şehîd kewtî, nêdanê keyeyanê ci. Goreyê îdîayan 39 cenazeyê aîdê HPGyijan ke nê operasyonan de weşîya xo kerdî vinî, morganê nêweşxaneyan de yenê vindernayen û herzewbîn 26 cenaze zî mezelanê bêkesan de amey definkerdiş.
Cenaze nêdanê malbatan
Qezaya Amed Licê de îlankerdişê “Qedexeyê vejyayîşê teber” ra dima, bi teyareyan hêrîşê hewayî virazîya û netîce de 14 HPGyijan weşîya xo kerd vinî. Verîya ke netîceyê testê DNA zelal bibê, nê cenazeyan ra 4ê ci mezelanê bêkesan de amey definkerdiş. Seba cenazeyê ke Nêweşxaneyê Perwerde û Lêkolînî yê Gazî Yaşargîl ê Amedî de yenê vindernayîş zî, 10 malbatan seba testê DNA nimûneyê gonî day. Rixmo ke tayî malbatan cenazeyê xo teşhîs kerdî zî, cenaze teslîmê malbatan nêamey kerden.
Morgî de vindarnenê
Verîya nika zî 15 cenazeyê aîdî HPGyijan ke tarîxanê ciya ciyayan de weşîya xo kerdî vinî, mezelanê bêkesan de ameybî definkerdiş. Reya 10 cenazeyê HPGyijan ke pirodayîşanê Dersim û Çewlîg de şehîd bî zî
Saziya Tiba Edlî yê Meletî de yenê vindernayen. Morgê Neweşxaneyê Dewlet yê Çewlîg de zî cenazeyêk esta. 15 HPGyijê ke çortalê Bedlîs de weşîya xo kerdî vinî zî, hewadîyay morgê Neweşxaneyê Dewlet ê Tetwanî.
Herzewbîn cenazeyê 7 HPGyijan ke weşîya xo kerdî vinî zî Wan de mezelanê bêkesan de amey definkerdiş. Cenazeyê 3 HPGyijê ke operasyonê çortalê Mêrdîn de weşîya xo kerdî vinî zî morgê Neweşxaneyê Dewlet yê Mêrdîn de yenê vindernayen.
AMED