RIFAT ŞAHÎN/DEVRAN TOPTAŞ / MA/AMED
Qezaya Licê ya Amedî ra girêdaye dewa Xiraba de 28ê êlula 2009î de Qereqolê Tapantepe ra guleyê hewanî amebî eştiş û netîceyê eştişê guleyî de Ceylan Onkola 12 serreyî ke heywananê xo çerênayêne, ameybî qetilkerdiş.
Herçiqas ke 8 serrî hedîser ser ro derbaz bîyî, labelê heta nika hetê huqûqî de gamêkî daxî nêameya eştiş û herinda ke berpirsîyaran ceza bikerî, xelat dayî înan. Dosyaya tehqîqatî ke erzîyaya refê Edlîyeya Licê, paweyê roja ke edalet bêro ya.
Aye roje ra nata seba ke serê doze bigîrî, keyeyê Onkolî ser ra zext û tedayî kemî nêkenî. Endamê keyeyê Onkolî bi desan reyan ameyî tepiştiş û serbest veradîyayî. Keyeyê Onkolî fek doza xo ra veranêdanî û doze kiriştî Mehkemeya Heqê Merdiman ya Ewropa (AÎHM), labelê herçiqas ke doze kirişîyaya AÎHMî zî, zext û tedayî keyeyî ser de dewam kenî.
Babete ser o pîyê Ceylan Onkole Raîf Onkole qisey kerd. Pîyê Ceylane dîyar kerd ke herçiqas ke 8 serrî qetilbîyayîşê Ceylane ser ro derbaz bîyî, reyna zî zextî înan ser de kemî nêbenî û wina domna: “Hende serrî derbaz bîyî, labelê hîna zî berpirsîyarî nêameyî mehkemekerdiş û înan ra hesab nêame perskerdiş. Seba ke lajê mi Rifat prosesê huqûqî taqîp keno, bi desan reyan raştê tehdît û zextan ameyo. Reyna bi desan reyan polîsan eşto keyeyê ma ser de û ci tepiştî.” Dewe ameye bombekerdiş
Raîf Onkolî va ‘Qereqolê Tapantepeyo ke bîbî sebebê qetilbîyayîşê Ceylane, demanê peyênan de vera dewijan de zextan zêdnayo’ û wina dewam kerd: “No qereqol ge-gane dewe ser de bombeyan varneno. Wexto ke mi fermandarê Qereqolî yê Tapantepe reyde na babete ser o pêvînayîş kerd, mi ra va ‘eke bombe heywananê to gina, fotografê ci biance û mi rê bîyare, ma do heqê to bidî to’. Mi zî ey ra va ‘eke merdimî bêrî kiştiş, o wext ma do se bikerî’? Eyî zî mi ra va ‘çi karê şima ewja de esto, kel-melê xo bigêrênê û ewja ra şêrê’.”
Avûkat û keyeyî muracatê AÎHMî kerdî
Keye û avûkatê Onkolî seba ke qerarê nimiteyî yê dosya bêro wedarnayîş, bi desan reyan muracat kerdî, labelê heme muracatê înan ameyî redkerdiş. Avûkat û keyeyî tewr peynî 8ê teşrîna peyêna 2010î de muracatê AÎHMî kerdî. Avûkat û keyeyî reyna 2012 de seba ke tehqîqat û cigêrayîşî bi hawayo xoser û objektîf nêameyênê kerdiş, doze nêameyêne akerdiş û kerdoxî nêameyêne dîyayîş, reyna muracatê AÎHMî kerdî.
Keyeyê Onkolî seba ke îhmal û berpirsîyarîya Wezîrîya Karê Zereyî estbî, derheqê înan de 100 hezarê ci madî, pêro pîya 150 hezar TL tazmînat bigîrî, Mehkemeya Îdareyo 2. yê Amedî de doze akerdî. Mehkeme waştişê tazmînatê manevî red kerde, û qerarê 28 hezar 208 TL tazmînato madî bidîyo keye daye.