Vakûrê Kurdistan de startê nûmayiş û aktivîteyanê 8ê Adar Sîlopya de yeno dayen. Cenî dê Pakîze Nayir, Sêvê Demîr û Fatma Ûyar ke hetê qûwetanê dewlet amey înfazkerdiş yad bikerê. Ceniyê Kurd yê ke emser bi slogana ‘cenî serva rayverî û serbestiya xo, xoverdanê’ 8ê Adar pêşwazî kenê, bi rojano hadreyinê nûmayişan kenê.
Ewro qezaya Şirnex Sîlopya de startê nûmayişan yeno dayen. Hemseroka HDP Fîgen Yuksekdag, Hemseroka KCD Selma İrmak ra piya xêlê ceniyê siyasetmedar û ronişteyê qeza tewrê nûmayiş benê. Cenî dê sifte 3 ceniyê kurd Pakîze Nayir, Sêvê Demîr û Fatma Ûyar ke hetê dewlet amey qetilkerden vîr biyarê. Malbatê Nayir, Demîr û Ûyar zî aşkere kerdî ke îye de zî tewrê nûmayiş bibê.
Batman de nûmayişî destpa kerdî
Rêxistina KJA yê Batman zî bernameyê xo yê 8ê Adar aşkere kerd. Hemseroka DBP yê Batman Nûrten Uzumcu vist vîrî ke ceniyê ke cayanê xorayverînan de danê xover hedefê êrişanê dewlet de yê. Uzumcu da zonayen ke pêrokîn cenî Clara Zetkîn ra heta Sara, Rojbîn, Ronahî, Sêvê, Fatma, Pakîzeyan ê. Nûrten Uzumcu aşkere kerd ke wayirvetişê Rayverê xo wezîfeyê esasî yê ceniyan o û da zonayen ke emser aktivîteyê 8ê Adar dê zey fîrazey nê zey vîrardişan ravêrê. Batman de aktivîteyê 8ê Adar ke 29ê Sibat de destpa kerdî, heta 8ê Adar ramenê.
Dîlok de bernameyê taybet
Dîlok de zî hadreyînê aktivîteyanê 8ê Adar ramenê. Merkezê Çand û Medya yê Dîlok hadreyînê bernameyekê taybet keno. Bername de Koma Erbanê yê Ceniyan û Gruba Tîyatro esta. Derheqê şîdet, tacîz, tecawizê vera ceniyan û tekoşîna ceniyan de kayekê tiyatro do bîro musnayiş.
Erzêrom de konferans
Qezaya Erzêrom Tatos de kî bi wesîleyê Roja Ceniyanê Emekdarî hadreyînê konferansekê yenê ramiten. Aktivîsta KJA yê Erzêrom Çîçek Sarialtin vist vîrî ke konferans do 2ê Adarî de viraziyo. Sarialtin da zonayen ke 10 hezarî ra vilavokî amey vilakerdin û nika zî dew bi dew, kêber bi kêber geyrenê û ceniyan silayînê konferansî kenê. Herzewbîn sûkanê bîn yê Erzêromî de zî hadreyînê 8ê Adar ramenê. Sarialtin hayr ant ablûqeya dewlet yê sûkanê Kurdistan ser û wina va: “Ma Tatos ra wazenê bibime cewabê sîstem. Ma estê, tiya deyê û nêtersenê. Ma dê meydanan de bê. Sarialtin va, bêrê ma piya zihnîyeta herbî rê vajê nê û vengê berzkerdişê tekoşîn da ceniyan.
Agirî de zî KJA 2ê Adarî de şiyayiş virazena. Ceniyan serva tewrbiyena nûmayiş vilavokî kerdî vila. Parlamentera HDP yê Agirî Dîrayet Taşdemîr, hemşaredar Mûkaddes Kûbilay ra piya xêlê ceniyê ke hadreyînan ramenê vilavokî kerdî vila û ceniyan ra waştî ke tewrê rayşiyîn bibê.
Îzmîr de Roja Ceniyanê Dinya
Kordînasyonê Sûk yê Îzmîr yê KJA zî bi kombiyayişê çapemenî bernameyê xo yê 8ê Adar aşkere kerd. Azaya KJA Sînem Işik va, ma dê 8ê Adarî de bi rihê xoverdayiş yê Sêvê, Pakîze û Fatmayan meydanan de bê. Işik aşkere kerd ke ceniyê kurd û şarê kurd encex bi serbestiya rayverê xo êşkenê azad bibê. Işik vist vîrî ke ceniyê kurd xoverdayişê xorayverînan rê pêşengtî kenê û wina va: “Wa dewleta serdest bizano ke cenî nêtersenê. Rexmê qetlîam û pêrokîn wehşetanê hinan ma dê meydanan de bê. Îzmîr de kî nûmayişê ke 1ê Adar de destpa kenê dê heta 8ê Adar biramê.
‘Her ca açarneme cayê tekoşînî’
Antalya de kî rîwalê bernameyê 8ê Adar damustayin ame dayen. Damûstayin de vajiya ke, ma ceniyê kurd ke goçê metropolanê Tirkiye bî, ma dê her ca açarnê qadanê tekoşîn. KJA veng da ceniyan ke tewrê nûmayişanê 8ê Adar bibê û wayrê xoverdayişê xorayverînan bivejyê. Antalya de kî gureyînê ke 1ê Adarî de destpa kenê, dê heta 8ê Adar biramê.
NAVENDÊ XEBERAN