Nisêbîn de 14ê adare de qedexeyê tebervejîyayîşê kuçeyan amebî îlankerdiş û dima ra hêzê dewlete hêrişê taxanê Dîcle, Firat, Yenîşehîr, Abdulkadîr Paşa, Zeynel Abîdîn û Kişla kerdbî. Hêrişan ver bi desan ciwanî merdbî û keyeyê ciwanan hîna zî cenazeyanê xo nêgirewtî. Hêrişan ra dima 6 taxê ke tede xoverdayîşê xoserîye amebî nîşandayîş, hetê hêzê dewlete ra ameyî/yenî rijnayîş.
Nê keyeyan ra yewe zî keyeyê Abdullah Akî yo. Abdullah Ak zî Nisêbîn de wextê qedexeyê tebervejîyayîşê kuçeyan de hetê hêzê dewlete ra amebî kiştiş û 9 aşmî yo ke cenazeya Akî teslîmê keyeyê ci nîno kerdiş. Babete ser o dayîka ci Ayten Ake û waya ci Dilşah Ake qisey kerdî.
Wa bireso herra xo
Dayîke Ake va ‘lajê mi rayîrêko birûmet de têkoşîn da û merd’ û qiseykerdişê xo wina domnaye: “Ez wazena wa yew mezelê ci bibo û ez biresa kateyanê ci. Eke ez bizanba laşê ci kura de yo û bişînba zîyaret bikera, o wext do tay boya mi biaba. Ez Dîlok, Mêrdîn û zaf morgê nêweşxaneyan de lajê xo gêraya. Wexto ke ma persê cenazeya xo kenî, vanî ‘çin o’. Ez reyna agêraya, taxan de lajê xo gêraya, la mi nêdî. Cenazeya lajê mi hîna taxan de yo, an dewlete girewto, ez nêzana. 9 aşmî yo ke ez cenazeya lajê xo gêrena. Lajê mi seba herra xo şer kerd û ma wazenî ke wa laşê ci bireso herra ke lajê mi ti ra zaf hes kerdêne. Wa no dej zerrîya ti kesî de nêmano.”
Sereyê ma berz o
Waya Abdullahî Dilşah Ake zî va ‘birayê mi nê erdan ra zaf heskerdêne û seba nê erdan têkoşîn da’ û wina dewam kerde: “Cok ra ganî laşê birayê mi bireso, herra xo. Birayê mi Abdullahî vatêne ‘Nisêbîn erdê ma yo, ma nêeşkenî erdê xo ra biaqityî.’ Waştiş û heskerdişê merdimêko winasî resayîşê herra xo yo. Ma zî sey merdimanê bînan wazenî biresî cenazeya birayê mi. Ma wazenî sax o û an merde yo, bimûsî. Eke birayê mi merdo zî, ma wazenî cenazeya ci bivînî û mezelê ci zîyaret bikerî. Têkoşînê Abdullahî ver sereyê ma berz o û ma wazenî reya peyên ci bivînî.”
ŞÛJIN / MÊRDÎN