9 hepsîyî 2 serrî yo hucre de yî
Hepsîyanê ke Zîndanê Tîpa Fyî yê Wanî de manenî, bi mektûbêkê qala neheqîyê ke zîndan de benî kerde. Hepsîyan dîyar kerd ke dormeyê cayanê hilmgirewtişî bi temamî ameyî girewtene û ê bênefes ameyî veradayene. Hepsîyan dayo zanayene ke 9 embazê înan 2 serrî yo tecrîd de yî û raya pêroyî ra waşt ke wa hesas bibî.
Hepsîyanê ke Zîndanê Tîpa Fyî yê Wanî de manenî, mektûbêk erşawite û derheqê neheqîyê ke zîndan de benî ardî ziwan. Hepsîyan mektûbe de neheqîyan rêz kerdî û dîyar kerdo ke Zîndanê Wanî sey herêma pîlote weçînîyaya kerdişê teberê ehlaqê merdimîye de yenî kerdene.
Hepsîyan mektûbe de dayo zanayene ke tewr peynî cayanê hilmgirewtişê zîndanî de têlî ameyî girêdayene û wina vato: “Bi no hewa ma bitemamî bênefes verdîyayî. Ma muracatê xeylê cayan kerd, labelê ti netîce nêvejîya. Sere de rojnameyê Yenî Yaşam û xeylê kitab, kovare û sewbîna nêdîyenî ma. Radyoyê ma nêdîyenî û herinda înan de radyoyê ke çîyêk nêancenî dîyenî ma.”
Hepsîyan dewamê mektûbe de qala sehnayîşan kerda û wina vato: “4-5 aşmanê peyênan de hema vaje her roje sehnayîşî yenî kerdene û kel-melê ma yenî serûbinkerdene. Seba ke huzûrê ma nêmano, çi destê înan ra bêro kenî. Bitaybetî grûbêk gardîyanan, çîyanê xirabinan kenî. Ma gerreyê înan kerd, labelê çîyêk nêbedilîya. Sewqê embazanê nêweşan seba nêweşxaneyî nînî kerdene. Tedawîya embazanê ke kewtbî grevê vêşanîye hîna nêameye kerdene. Reyna embazê ke ganî şêrî zîndananê qezayan, sewqê înan nîno kerdene.”
9 embazê ma 2 serrî yo tecrîd de yî
Mektûbe de bale ancîyaya rewşa 9 hepsîyan ser û mektûbe de wina ameyo vatene: “9 embazê ma bi kerdişo ke ti cayan de nimuneyê ci çin o, 2 serrî yo yenî tecrîdkerdene. Nê embazî nêşênî ti aktîvîteyan de ma reyde bêrî têhet. Nameyê nê embazan Botan Tîmûr, Dîvalî Acar, Medet Orûç, Mert Ekîncî, Adnan Mîrzaî, Nîhat Şahîn, Nevroz Korkmaz, Şaban Tekîn û Nazmî Aydin o û vera nê embazan de muameleyêko xirabin yeno kerdene. Reyna embazê ke sewbînan zîndanan ra erşawîyenî tîya, bi rojan yenî tecrîdkerdene û ti lazimîya înan bica nîna.”
Ma hêvî kenî ke herkes do hesas bibo
Hepsîyan peynîya mektûbe de veng dayo raya pêroyî û waşto ke wa herkes no het de hesas bibo. Hepsîyan mektûba xo wina qedênayo: “Ma hêvî kenî ke raya pêroyî seba rewşa ma hesas bibo û hetê eleqedarî bikewî têgêrayîşî mîyan. Vera 3 embazê ma yê ke cezaya muebeto girankerde girewta de zî kerdişê keyfinî yenî kerdene. Ê zî nêşênî beşdarê ti aktîvîteyanê sosyal û sportîfan bibî.”
AMED
Seba ke destê hepsîyî tepişt, ceza girewt
Heto bîn de Lajê Abdurrahman Avciyî Mûrat Avci Zîndanê Turkoglu yê Gurgumî de tepişte yo. Wexto ke Abdurrahman Avci şono pêvînayîşê lajê xo, ewja de destê hepsîyêk zî tepişeno û merheba dano ci. No semed ra seba serrêk cezaya qedexeyê pêvînayîşî dîyeno Avci û destûr nêdîyeno ke lajê xo bivîno. Avci vano ‘ez 8ê Tebaxe de şîya pêvînayîşî’ û wina dewam keno: “Labelê destûr nêdîya ma yewbînan bivînî. Heme hepsîyî ameybî derbkerdene. Mi zî rewşa înan daye çapemenîye. Dima ra her ke ez şîya zîndan, zextî zêdeyêr bîyî. Tewr peynî ez 6ê Êlule de şîya pêvînayîşo akerde. Ewja de seba ke mi destê hepsîyo bi nameyê Serhatî tepişt, gardîyanî da destê mi ro. Dima ra gardîyanan heqaretê mi kerd. Ez lajê xo ra etirîyena.”
MÊRDÎN
